“Xəzər adaları” dağılmır, UEFA kubokunda da özümüz oynayacağıq”

Futzal üzrə ölkə çempionu adını qazanan “Xəzər adaları”nın baş məşqçisi Elnur Qəmbərov komandasının dağılacağı, UEFA kubokunda ölkəmizi çempionatın gümüş mükafatçısı “Fənər”in təmsil edəcəyi haqda yayılan xəbərlərə münasibət bildirib. Gənc mütəxəssis Futbolxeber.az saytına verdiyi açıqlamada deyilənlərin yalan olduğunu vurğulayıb: “Dünən “Avesta” şirkətində komandayla görüş oldu. Görüş zamanı legionerlərin bilet məsələsinə aydınlıq gəldi. Komanda üzvlərinə deyildi ki, ayın 22-si üçün onların biletləri alınacaq. Həmçinin oyunçuların minimum 1 aylıq maaşları gedənə kimi ödəniləcək. Komandanın dağılacağı haqda xəbərlər boş söhbətlərdi. Belə xəbərlərə inanmayın. UEFA kubokunda elə “Xəzər adaları” oynayacaq”.

Elnur Qəmbərov mətbuat nümayəndələrinə də müraciət edib: “İstərdim ki, sualı olanlar mənə müraciət etsinlər. Bəzi oyunçularla da danışmışam. Hər şey qaydasındadır. Mətbuat nümayəndələrindən də xahiş edirəm ki, hər hansı bir məlumatı əldə etdikdə, klubdan dəqiqləşdirib, sonra yazsınlar. Gündə bir xəbər eşidirəm. Gah deyirlər k, legionerlər hücum çəkirlər, gah da deyirlər ki, oyunçular səfirliyə şikayət edəcək. Amma bütün bunlar yalandır”.