“Qarabağ” çempion olmaq istəyir”

"Yaxşı oyun keçirdik. Bəli, bir oyunda üç qol buraxmaq istəməzdik, amma eyni zamanda üç qol da vurduq. Bu, müsbət məqamdır. Oyunun sonunda hesabı 3:3 etməyi bacardıq və düşünürəm ki, bu, yaxşı nəticədir”.

Futbolxeber.az saytının məlumatına görə, bu sözləri “Qarabağ”ın hücumçusu Zakaria Savo Azərbaycan Premyer Liqasının VIII turunda “Neftçi”yə qarşı keçirdikləri oyun barədə danışarkən deyib.

İsveçli futbolçu qeyd edib ki, matçın gedişində hesabda 2 top fərqi ilə geri düşsələr də, sona qədər inamlarını itirməyiblər:

“Yüz faiz inam var idi. Son künc zərbəsi zamanı hətta qapıçımız da hücuma qoşuldu”.

26 yaşlı forvard növbəti matçdan da söz açıb:

“Sabah”la matçda qələbə qazanmaq istəyirik. Yeganə məqsədimiz qalib gəlməkdir. Çempion olmaq istəyirik və bunun üçün liqanın ən güclü komandalarına da qalib gəlməliyik. Buna görə də “Sabah”la matçda üç xal qazanmaq istəyirik”.

Sonda Savo azarkeşlərə təşəkkür edib:

“Fanatlara təşəkkür edirəm. Bu gün stadiona çox azarkeş gəlmişdi. Onları stadionda görmək həmişə xoşdur. Hər zaman fanatların gəlib bizə enerji vermələrini istəyirik”.