Ukrayna millisinin baş məşqçisi Kaşukun debütunu dəyərləndirdi

Ukrayna millisinin baş məşqçisi Andrea Maldera dünən UEFA Millətlər Liqasının beşinci turu çərçivəsində dünən Şimali İrlandiyaya qarşı keçirilən oyundan (0:1) sonra “Qarabağ”ın üzvü Aleksey Kaşukun yığmadakı debütunu dəyərləndirib.

Futbolxeber.az saytının məlumatına görə, o, vingerin debütunu müsbət dəyərləndirib:

"Kaşuk öz klubunda da təxminən eyni mövqedə çıxış edir. Debüt etdiyini nəzərə alsaq, o, olduqca yaxşı oyun nümayiş etdirdi. Hətta təşəbbüsü öz üzərinə götürdüyü iki epizod sayəsində qol vurmaq üçün iki imkan yarada bildi".

Ukrayna millisinin baş məşqçisi Kaşukun müdafiənin cinahında oynaması belə aydınlıq gətirib:

"Onun beşli müdafiənin cinah müdafiəçisi (wing-back) kimi çıxış etməsinə gəlincə, biz rəqibin çox da boşluq olmayan mərkəzi blokunu keçməyə çalışırdıq. Bəzən buna nail olduq, bəzən isə yox. Lakin düşünmürəm ki, yaranan problemlər məhz taktiki sxemdən qaynaqlanırdı. Biz çox az risk etdik və oyun əsasən fərdi qarşıdurmalar, təkbətək mübarizələr üzərində cəmləşmişdi".