“Bakı-2015”in idman elçisi: “Yarışlarda himnimizin səsləndirilməsi və bayrağımızın ucaldılması məni xoşbəxt edir”

“İdman yarışlarında himnimizin səsləndirilməsi və bayrağımızın ucaldılması məni xoşbəxt edir”. Futbolxeber.az-ın “Azərtac”a istinadən verdiyi məlumata görə, bu sözləri “Bakı-2015” ilk Avropa Oyunlarının idman elçisi, basketbol 3x3 üzrə Azərbaycan millisinin üzvü Amil Həmzəyev deyib.

Basketbolçu ardıcıl iki dəfə Avropa inkişaf kuboku yarışlarında qalib gəlməsini ən böyük nailiyyəti olduğunu bildirib. Açıq havada oynanıldığı üçün basketbolun 3x3-ün çətinliyi hava şəraitindən asılıdır. Azərbaycan çempionatında “Gəncə” komandasının tərkibində Bakı Dövlət Universitetinin kollektivi ilə görüş mənim üçün unudulmazdır. Çünki həmin oyunda 144 xallıq nəticə ilə Azərbaycanın basketbol tarixinə düşdüm.

İdman aləmində əfsanəvi basketbolçu Maykl Cordanın azarkeşi olduğunu diqqətə çatdıran Amil Həmzəyev “Əgər peşəkar idmançı olmasaydın, nə ilə məşğul olardın?” sualına cavabında deyib: “Yəqin ki, Dəniz Akademiyasını bitirib hansısa gəminin kapitanı olardım”.

Birinci Avropa Oyunlarında doğma azarkeşlər qarşısında çıxış edəcəyi üçün həyəcanlı olduğunu deyən basketbolçu “Bakı-2015”ə ciddi hazırlaşdığını diqqətə çatdırıb.