Coe Coys: “İlk Avropa Oyunlarında mükafatçılar sırasında yer almaq istəyirəm”

“Bakı-2015” ilk Avropa Oyunlarının iştirakçısı olmaq çox qürurvericidir. İyunda bütün dünyanın diqqəti Bakıya yönələcək. Birinci Avropa Oyunlarında uğurla çıxış edib mükafatçılar sırasında yer almaq istəyirəm”. Futbolxeber.az-ın  “Azərtac”a istinadən verdiyi məlumata görə, bu sözləri Böyük Britaniyanı ilk Avropa Oyunlarının boks yarışlarında 91 kiloqramdan yuxarı çəki dərəcəsində təmsil edəcək Coe Coys deyib.

Boksçu qeyd edib ki, “Rio-2016” Yay Olimpiya Oyunlarından əvvəl “Bakı-2015” çox önəmli yarışdır. Olimpiya Oyunlarına gedən yolda “Bakı-2015”i təsnifat xarakteri kimi də dəyərləndirmək olar. Bakıda qazanacağımız nailiyyətlər Braziliyada təşkil olunacaq planetin ən böyük idman yarışına əzmlə hazırlaşmağımıza təkan verəcək.

İlk Avropa Oyunlarında güclü rəqiblərlə üz-üzə gələcəyini bildirən Coe Coys yarışların gərgin idman mübarizəsi şəraitində keçəcəyini diqqətə çatdırıb.

Britaniyalı atletlər “Bakı-2015” ilk Avropa Oyunlarında idmanın 13 növü üzrə medallar uğrunda mübarizə aparacaqlar.