AFFA Əliyar Ağayevi cəzalandırdı - FOTOFAKT

AFFA Əliyar Ağayevi cəzalandırıb.

Futbolxeber.az saytının məlumatına görə, FİFA referisinin “Turan Tovuz”la oyunda buraxdığı səhvlər cəzasız qalmayıb.

Düzdür, hələlik Ağayevin neçə oyun cəzalandırıldığı məlum deyil. Lakin onun cəzalanmasını sübut edən fakt daha əvvəl aldığı təyinatın ləğv olunmasıdır.

Belə ki, aprelin 4-də Azərbaycan Premyer Liqasında 26-cı turun oyunları üçün hakim təyinatları açıqlanarkən Əliyar Ağayev “Qarabağ” - “Karvan-Yevlax” matçına təyinat almışdı. FİFA referisi bu matçda AVAR-da olmalı idi.

Lakin Əliyar Ağayev hazırda ilk hissəsi oynanılan matçda iş başında deyil. Görüşün protokolundan da göründüyü kimi, bu matçda AVAR-da Tural Qurbanovdur.Maraqlıdır ki, bu görüşün hakim-inspektoru da Rəhim Həsənovdur. Hansı ki, bir neçə saat əvvəl məhz o, Əliyar Ağayevin “Turan Tovuz” - “Zirə” matçında meydan sahiblərinin iki penaltisini vermədiyini açıqlamışdı.