Hamı yaxşı, bircə Əliyar pisdir?

Gözlənildiyi kimi, AFFA Hakimlər Komitəsinin sədri Rəhim Həsənov “Turan Tovuz” - “Zirə” oyununun baş hakimi Əliyar Ağayevin kubok matçında səhvə yol verdiyini, Tovuz klubunun lehinə iki penaltinin təyin olunmadığını açıqladı. Əslində, Həsənovun məhz bu cür açıqlama verəcəyi gözlənilən idi.

Birincisi, Rəhim Həsənov hakim olduğu vaxtlarda daim Əliyar Ağayevin kölgəsində qalıb. Eyni vaxtda FİFA referisi olsalar da, təyinat aldıqları oyunlar arasında böyük uçurum olub. Əliyar Ağayevin baş hakim olduğu matçlarda Rəhim Həsənov dördüncü hakim funksiyasını yerinə yetirib. Ümumiyyətlə, Əliyar Ağayev Çempionlar Liqasında oyun idarə etsə də, Rəhim Həsənov karyerası ərzində cəmi 8 dəfə beynəlxalq təyinat alıb. UEFA-nın Regionlar Kubokundan tutmuş maksimum Avroliqanın I təsnifat mərhələsi matçlarına qədər. O da Bosniya və Hersoqovina, Andorra kimi futbolu inkişaf etməyən ölkələrin klubların oyunlarına. FİFA referisi statusu almasına, ölkə daxilində bir çox vacib matçları idarə etməsinə baxmayaraq, qitə futbol qurumu heç vaxt Həsənova normal təyinat verməyib. Bunun səbəbini anlamaq üçün də Məşədi İbad demiş, “Tarixi Nadiri” yarıya qədər oxumağa ehtiyac yoxdur. Bir sözlə, daim Ağayevin kölgəsində qalan Həsənov indi hər fürsətdə sabiq həmkarından əvəz çıxmağa, onu gözdən salmağa çalışır.

İkinci məsələ “Şamaxı” - “Neftçi” matçında verilən penaltidir. Mustafa Sekin kobud oynadığı iddia olunan epizodla Ruan Renatonun vəziyyəti oxşardır. Belədə Həsənov Əliyar Ağayevin doğru qərar qəbul etdiyini açıqlasaydı, ortaya Şamaxıdakı oyunla bağlı saysız suallar çıxacaqdı, yenidən “Neftçi” azarkeşlərinin “hücumuna məruz qalacaqdı”.

Üçüncü məqam isə ən vacibidir. Söhbət bu məsələnin “Sabah”a və ya “Qarabağ”a aidiyyətinin olmamasından gedir. Hər nə qədər çoxları qəbul etməsə də, reallıqdır ki, AFFA rəhbərliyində dəyişiklikdən sonra iki ildir hakimlər çətin vəziyyətdə “Sabah”a kömək edirlər. Bəli, bu mövsüm paytaxt klubu baxımlı futbol sərgiləyir, inamlı təsir bağışlayır. Lakin “Neftçi”, “Qəbələ” və digər oyunlar var ki, “Sabah” həmin görüşlərdə məhz hakimlərin “səhvləri” nəticəsində xal və xallar qazanıb. Odur ki, and içə bilərəm, amma sübut edə bilmərəm ki, eyni epizod “Sabah”ın qapısında olsaydı, Rəhim Həsənov Əliyar Ağayevi məcburən “haqlı” çıxaracaqdı. “Zirə”nin lehinə olan səhvi etiraf etməyə nə var ki... Oğul odur “Sabah”ın lehinə olan səhvi etiraf etsin.

“Qarabağ”ın da adını ona görə çəkdik ki, Ağdam klubu hazırda “Sabah”ın çempionluğuna mane ola biləcək yeganə komandadır. Gəl ki, hakimlər buna imkan vermirlər. Çox uzağa getmək lazım deyil. Elə “Kəpəz” - “Qarabağ” oyununda verilməyən penalti bariz nümunədir. Həmin epizodda penalti olduğu Bakıdan da görünürdü. Gəl ki, bunu Yevlaxda nə Rauf Cabarov “gördü”, nə də VAR. Yəni sözümüzün canı odur ki, burada məsələ Əliyar məsələsi deyil. Bəli, Ağayev “Turan Tovuz”un penaltilərini vermədi. Amma bu mövsüm yeganə səhv edən hakim məgər Əliyar Ağayevdir? Guya başqaları aydan arı, sudan durudurlar? Bircə Əliyar pisdir, qalanları yaxşı? Təbii ki, yox. Buna qədər Rauf Cabarov da, Kamal Umudlu da, İnqilab Məmmədov da səhvə yol veriblər. Sadəcə burada məsələ kluba görə dəyişir. “Zirə”nin yerində “Sabah”, “Turan Tovuz”un da əvəzinə “Qarabağ” olsaydı, Rəhim Həsənov bu gün Əliyar Ağayevi haqlı çıxaracaqdı. Sadəcə məsələnin birbaşa “Sabah”a aidiyyəti olmadığı üçün Həsənov ədalətli olmaq “qərarına gəlib”. Ay-hay, inandıq...

İBRAHİM