Aleksandr Ramalinqom: “Anlaya bilmirəm ki, nəticə necə belə oldu”

“Sumqayıt”ın hücumçusu Aleksandr Ramalinqomun Futbolxeber.az saytına müsahibəsi

- Azərbaycan Premyer Liqasının 26-cı turunda “Neftçi”yə 1:3 hesabı ilə uduzdunuz. Məğlubiyyətə səbəb nə oldu?

- Bu nəticəyə görə komandada heç kim xoşbəxt deyil. Anlaya bilmirəm ki, nəticə necə belə oldu. Halbuki biz ikinci hissəyə çox yaxşı başladıq. Hesabı bərabəşdirdik. Daha bir qola ehtiyac duyurduq. Lakin əvəzində qapımızda qollar gördük. Bu, heç də yaxşı hal deyil.

- Qeyd etdiyiniz kimi, ikinci hissəyə yaxşı başladınız, rəqibi qapısına doğru sıxışdırdınız. Hesabı bərabərləşdirdikdən sonra ikinci qolu vurmağınız üçün nə çatışmadı?

- Dəqiq fikir bildirməkdə çətinlik çəkirəm. Həqiqətən də fasilədən sonra üstünlük bizim tərəfimizdə idi. Amma standart vəziyyətdən sonra qapımızda qol gördük və yenidən hesabda geri düşdük. Bundan sonra nə qədər çalışsaq da, məğlubiyyətdən qaçmaq mümkün olmadı.  

- “Sumqayıt” uzun müddətdir qələbəyə həsrətdir. Qış fasiləsindən sonra nə baş verdi ki, komanda belə uğursuzluqla üzləşdi?

- Mən də bunu anlaya bilmirəm. Bəzən yaxşı oynamırıq. Lakin yaxşı oynayanda da uduzuruq. Dəqiq söz deməkdə çətinlik çəkirəm. İndiki məqamda yalnız daha çox çalışmalıyıq.

- Yəqin razılaşarsınız ki, artıq “Sumqayıt”ın avrokubok hədəfi real deyil...

- Bəli, təəssüf ki, elədir. Amma sona qədər mübarizə aparmalıyıq. Əlimizdən gələni etməliyik ki, qarşıdakı matçlarda daha yaxşı çıxış edək və mümkün qədər çox xal toplayaq.

- Növbəti turda “Turan Tovuz”la qarşılaşacaqsınız. Həmin matçda uğursuz gedişata son qoymaq nə dərəcədə realdır?

- “Turan Tovuz” da çox güclü komandadır. Odur ki, bizi qarşıda çətin oyun gözləyir. Lakin əlimizdən gələni etməliyik ki, yaxşı nəticə qazanaq. Bunun üçün daha çox çalışmalı, daha ciddi olmalıyıq. Oyunumuzu da mütləq yaxşılaşdırmalıyıq.