Vensan Abubakar: “Qarşıdakı hər matç "Neftçi" üçün finaldır”

“Komanda çox yaxşı çalışır. Oyundan oyuna özünəinam artır. Bunu vurğulamaq lazımdır. Eyni ruhda davam etməliyik. Qarşıdakı hər matça final kimi yanaşmalıyıq”.

Futbolxeber.az saytının məlumatına görə, bu sözləri “Neftçi”nin hücumçusu Vensan Abubakar Azərbaycan Premyer Liqasının 26-cı turunda “Sumqayıt”ı 3:1 hesabı ilə məğlub etdikləri oyun barədə danışarkən deyib.

“Neftçi TV”yə danışan kamerunlu forvard komandasının qol epizodlarını qaçırmasına belə münasibət bildirib: “Bugünkü matçda 1 hücumçu ilə oynayırdıq. Bunun çətin tərəfləri də var. Hər matçdan sonra səhvlərimizi təhlil edirik. Bunu yaxşılaşdırmaq olar. Məşqlərdə qapı önündə zərbələr üzərinə daha çox işləməliyik”.

Ulduz futbolçu “Neftçi”ni qarşıda “Araz-Naxçıvan”, “Zirə” və “Qarabağ”la 2 matç gözləməsinə də toxunub: “Qarşıdan gələn oyunların hər biri bizim üçün final kimi olacaq. Biz “Neftçi”yik və bunu meydanda göstərməliyik”.