Azər Həşimov: “Məğlubiyyətə layiq deyildik”

“Karvan-Yevlax”ın baş məşqçisi Azər Həşimov Azərbaycan Premyer Liqasının 9-cu turunda “Turan Tovuz”a məğlub olduqları oyunla (1:2) bağlı danışıb.

Futbolxeber.az saytının məlumatına görə, o, görüşdən sonra təşkil olunan mətbuat konfrasında komandasının məğlubiyyətini belə şərh edib:

“Oyuna hazırlaşmaq üçün 4 gün vaxtımız oldu. Hesabda öndə olduğumuz vaxt rəqibin heç bir real qol imkanı yox idi. Futbolda belə hallar olur – yaxşı oynayırsan, amma məğlub olursan. Sevindirici haldır ki, bu gün kapitanımız Araz Abdullayev meydana çıxdı. 14 ildən sonra “Karvan-Yevlax” yenidən Premyer Liqadadır. Qarşıda çox oyunlar var, əlimizdə olan imkanlarla vicdanla işləyirik. Komanda əzmkar futbol göstərdi, amma məğlubiyyətə layiq deyildik.”

Mütəxəssis qapıçı dəyişikliyi barədə də danışıb: “Kamran İbrahimov ilk hissədən sonra özünü yaxşı hiss etmirdi, ona görə də dəyişiklik etdik. Əmrah Bulud onu layiqincə əvəzlədi.”

Sonda Həşimov istefa ehtimalı ilə bağlı suala cavab verib: “Məşqçinin işi elədir ki, axsama varsa, o tədbir görməlidir. Yeni komandayıq, bacardığımız qədər ən yaxşısını etməyə çalışırıq. Rəhbərlik bizə dəstək olur. Sadəcə, hələ öz meydanımızda oynaya bilmirik. Bu da nəticələrə müəyyən qədər təsir edir”.