Aytor Paredes: “Qarabağ” nəyə qadir olduğunu göstərib”

“Bu, çox vacib, demək olar ki, həyati oyundur. Çünki bizim sıfır xalımız var. Evdə güclü olmalıyıq, 3 xal qazanmaq istəyirik və bunun üçün qələbəyə oynayacağıq”.

Futbolxeber.az saytının məlumatına görə, bu sözləri “Atletik”in futbolçusu Aytor Paredes UEFA Çempionlar Liqasının Liqa mərhələsinin 3-cü turunda "Qarabağ"la oyunla bağlı təşkil olunmuş mətbuat konfransında deyib.

İspaniya millisinin də üzvü olan 25 yaşlı müdafiəçi deyib ki, azarkeşlərinin dəstəyi ilə meydana çıxacaqlar: “Onların verdiyi enerji bizə əlavə güc qatacaq. Cəsarətli olmalı, qorxmadan irəli getməli və qollar vurmağa çalışmalıyıq”.

O, “Qarabağ”dan çəkindiklərini gizlətməyib və rəqibləri barədə müsbət fikirlər səsləndirib: “Bəziləri “Qarabağ”ı az ciddiyə alır, amma biz soyunma otağında bunu etmirik. Təzyiq altında olmasaq da, buna zərurət var. Evdə hələ 3 oyunumuz var və bunlardan maksimum yararlanmalıyıq. Çünki Çempionlar Liqasında səfərdə qələbə qazanmaq çox çətindir. Daha aqressiv və dişli olmalıyıq”.

“Qarabağ” barədə fikirlərini davam etdirən Paredes bildirib: “Onların 6 xalı olması sürpriz deyil, biz də istərdik o qədər xalımız olsun. Rəqibi çətin komanda kimi görürük, çünki bunu nəticələrlə sübut ediblər. Bilbaoya sadəcə oynamaq üçün gəlməyiblər, onlar da qazanmaq istəyirlər. Biz özümüzü favorit hesab etmirik. Bu, maraqlı və çətin bir oyun olacaq.

Onlar sona qədər mübarizə aparan komandadır, çətin anlarda da oyundan düşmürlər, sabit oynayırlar və qol  vurmaq gücünə malikdilər. Bütün Çempionlar Liqası komandaları kimi onların da yaxşı tərəfləri var. Biz onları hörmətlə qarşılayırıq, çünki nəyə qadir olduqlarını göstəriblər”.

Xatırladaq ki, "Atletik" - "Qarabağ" oyunu oktyabrın 22-si, Bakı vaxtı ilə saat 20:45-də başlanacaq.