Berdıyevdən uğurlu start

Tovuz stadionu demək olar ki, komanda Premyer Liqaya qayıtdıqdan sonra hər matçda izdihama şahidlik edir. Lakin bu dəfə “Sumqayıt”a qarşı oyuna daha çox maraq olacağı gözlənilən idi. Çünki bu, təcrübəli Kurban Berdıyevin yerli publika ilə ilk görüşü idi. Azərbaycan çempionatındakı debüt matçında “Neftçi” səfərində qazanılan 1 xal tovuzluların təcrübəli mütəxəssisə və komandaya olan inamını artırmışdı... 

Matçın başlamasına artıq 1 saat qalmışdan tovuzlu azarkeşlər stadionda yerlərini tuturdular. Tovuz stadionunda yaradılan fan-şopun qarşısında da izdiham var idi. Xüsusən də azyaşlılarla birgə stadiona gələn valideynlər kiçik hədiyyə ilə belə olsa, övladlarını sevindirməyə çalışırdılar.

Digər diqqətçəkən məqam qız övladlarını da stadiona gətirən valideynlər idi. Təbii ki, bölgə stadionunda bu cür mənzərə ilə qarşılaşmaq çox xoşdur.

Matçın startında “Berdıyev, Berdıyev” şüarları qulaq batırırdı. Tovuzlu fanatlar böyük ümidlər bəslədikləri təcrübəli mütəxəssisi ayaqüstə, dayanmadan alqışlayırdılar. Ümumiyyətlə, dünən Tovuz şəhər stadionunda möhtəşəm ab-hava var idi. Fanatlar dayanmadan sevimli komandalarını qələbəyə səslədilər. Əminliklə demək olar ki, “Sumqayıt” üzərində qazanılan 3 xalda 12-ci oyunçu statusunu artıqlaması ilə doğruldan Tovuz publikasının böyük rolu oldu.

Matç barədə qısaca onu deyək ki, ilk hissədə “Turan Tovuz” yaxşı təsir bağışladı. Fasilədən sonra “Sumqayıt” topa daha çox nəzarət edən tərəf olsa da, heç cür rəqib qapısına yol tapa bilmədi. Belədə, Kurban Berdıyev və komandası yerli publika önündəki ilk sınaqdan uğurla çıxdı deyə bilərik. Düzdür, iki tur çox qısa müddətdir və 180 dəqiqəyə görə hansısa futbolçuya, məşqçiyə və ya komandaya qiymət vermək üçün tezdir. Lakin istənilən halda geridə qalan “Neftçi” və “Sumqayıt”la oyunlar “Turan Tovuz”un gələcəyi barədə optimist düşünməyə əsas verir. Ehtiram Quliyev başda olmaqla klub rəhbərliyi uğur qazanmaq üçün əlindən gələni edir. Belədə Berdıyevin təcrübəsinin və azarkeşlərin dəstəyinin “Turan Tovuz”u uğura daşıyacağını proqnozlaşdırmaq olar...

Fərəc Aslanov