Azər Bağırov: “Çalışırıq ki, hər iki “qarpız”ı əlimizdə saxlayaq”

“Araz-Naxçıvan”ın baş məşqçisi Azər Bağırovun Futbolxeber.az saytına müsahibəsi

- Komandanız artıq 2 gündür məşqləri bərpa edib. İlkin təəssüratlarınız necədir?

- Əsas olan komanda üzvlərinin yüksək əhval-ruhiyyədə qayıtmasıdır. Görünür ki, yaxşı istirahət ediblər. Bu fasilədən, istirahətdən sonra görəcəyimiz çox yaxşı işlərimiz var. Oyunçular məsuliyyətlərini dərk etməlidirlər. Daha çox çalışmalıyıq, 3-cü və 4-cü dövrə daha çətin olacaq. Çempionatımızdakı rəqabətə, standartlara cavab verməliyik.

- Transfer çalışamaları ilə bağlı nə kimi yeniliklər var?

- Yeni transferlər üçün planlar var. Transferlər ediləcək. Bəzi yerli futbolçularla danışırıq. Onların arasında həm gənc, həm də təcrübəli oyunçular var. İstərdik ki, heyətimizi yerli futbolçularla zənginləşdirək. Bunun necə alınacağını zaman göstərəcək.

- Ümumiyyətlə, hansı mövqeləri gücləndirmək istəyirsiz?

- Ümumi olaraq bütün mövqeləri gücləndirmək istərdik. Sadəcə olaraq bugünkü imkanlar, klublardakı vəziyyət buna imkan vermir. Çalışırıq ki, bütün mövqelərdə yerli futbolçularla rəqabət olsun. Demək olar ki, çempionatın ilk dövrəsində stabil oynayan Abdulla Rzayev və Turan Manafov üçün də rəqabət aparan futbolçular olmalıdır, ən azından onlar da olduqlarından daha yaxşı statusa gəlib çıxsınlar.

- Komandanı tərk edən olub?

- Ayrılanlarla bağlı tam nəsə demək istəmirik. Yəqin ki, yerli futbolçuların transferindən sonra hər hansısa dəyişikliklər olacaq. Çünki standartlara cavab verən, oyun tərzimizə uyğun olan futbolçuları saxlayacağıq. Hər hansısa futbolçunu göndərməyəcəyik, sadəcə ola bilər ki, bəzilərini icarəyə verək.

- “Araz-Naxçıvan” heyətində 2 legioner qapıçı olan azsaylı klublardandır. Demək olar ki, meydana çıxmayan Semir Bukviçlə vidalaşmaq fikriniz var?

- Bukviçin komandadan ayrılmaq ehtimalı yoxdur. Hələ ki, yerli qapıçı yoxdur ki, Bukviçi əvəz etsin. Həm də Bukviç maddi baxımından yüksək ödənişli deyil, bu baxımdan bizə sərf edir. Hələ ki, onunla davam edirik. Yerli qapıçı tapsaq, Bukviç öz ölkəsinə qayıdacaq. Orada qapıçının oynayacağı hazır klubu var.

- Gedişatdan asılı olaraq “Araz-Naxçıvan”ın çempionatı kuboka, yaxud kuboku çempionata qurban verməsi mümkündürmü?

- Yaxşı yerlər uğrunda mübarizə üçün çalışırıq. Oyunlara qələbə üçün çıxırıq. Kubok və ya çempionatın fərqi yoxdur. Bir məsəl var: "Bir əldə iki qarpız tutmaq olmaz". Biz isə çalışırıq ki, hər iki "qarpız"ı əlimizdə saxlayaq. Heç birindən məhrum olmaq istəmirik. Buna görə də yerli futbolçuların həm keyfiyyətini, həm də sayını artırmaq istəyirik.

- Çempionatı altıncı pillədə başa vursaz da, ikinci yerlə aranızda 3 xal fərq var. Bundan sonrakı hədəflər nədir?

- Çalışacağıq ki, 3 və 4-cü dövrədə daha sürətli, rəngarəng, çevik "Araz Naxçıvan" görəsiniz. Rəqiblər bizə qarşı daha ciddi hazırlaşır. Biz də öz oyun üslubumuzu, keyfiyyətimizi daha da yaxşılaşdırmalıyıq.

- “Zirə”ni çıxmaq şərti ilə 3-8-ci yerlərdə qərarlaşan, belə deyək, əsas rəqibləriniz olan kollektivlərin hamısı təlim-məşq toplanışı üçün Antalyaya yollandı. Bu məqam “Araz-Naxçıvan”ın əleyhinə işləməyəcək?

- Bu barədə zərrə qədər də düşünmürük. Komandamız çempionata 10 gün qalmış yığıldı. Liqaya çox yaxşı başladıq. Fikrimcə, 18 oyunda cəmi 2 dəfə zəif matç keçirdik. Çalışacağıq ki, komandamız üçün daha yaxşısını edək.

- Mətbuatda Rəhim Sadıxovla maraqlanmağınızla bağlı xəbər yayılıb. Bunu necə şərh edərdiniz?

- Bu gün Premyer Liqada olan bütün yerli futbolçularla maraqlanırıq. Burada tək Rəhimin adını xüsusilə qeyd etmək istəməzdim. Bütün yerli futbolçulara marağımız var. "Sabah", "Zirə", "Qarabağ"da daha az oyun keçirən yerli futbolçuları komandamızda görməz istərdik. Rəhim Sadıxov da həmin oyunçulardan biridir.

Azad NURİYEV