Tofiq Musayevə qələbə üçün 27 saniyə bəs etdi

Azərbaycanlı MMA döyüşçüsü Tofiq Musayev dünyanın ən məşhur turnirlərindən biri olan “Bellator”da debüt edib.

Futbolxeber.az saytının məlumatına görə, ABŞ-ın paytaxtı Vaşinqtonda yüngül çəkidə (70 kq-a qədər) rinqə çıxan idmançının rəqibi yerli Sidney Autlou olub. Tofiq ABŞ təmsilçisini ilk raundda 27 saniyəyə nokaut edib.

Tofiq Musayev qələbəsini belə şərh edib: "Əvvəlki müsahibəmdə də demişdim ki, döyüş vaxtından tez qurtaracaq. Sevindirici haldır ki, vaxtından əvvəl qələbə qazandım. Rəqibə hörmətlə yanaşıram. Reytinqdə 1-ci yerdə gedirdi. Düşünürdüm ki, döyüşümüz maraqlı olacaq. Belə olub-olmadığını tamaşaçılar deyə bilər. Artıq təlim-məşq toplanışı haqqında fikirləşirik. Hazırlıq keçəndən sonra məşqçilər heyəti və menecerim məsləhət görərsə, növbəti aylarda döyüşməyə hazıram. Bu qələbəmi məşqçi heyətinə borcluyam. Şəxsi məşqçim Ruslan Əfəndiyevə, Rüfət və Raminətəşəkkürümü bildirirəm. Məni bu döyüşə hazırlamaq üçün çox əziyyət çəkdilər".

O, vurğulayıb ki, "Pitbull" ləqəbli braziliyalı Patriki Freyre ilə Azərbaycanda revanş döyüşünü keçirmək istəyir: "Çox istərdim ki, "Bellator" Vətənimdə olsun. Bu, bir çox yeniyetmə və gəncin bu idman növünə marağını daha da artırar. "Bellator"la müqavilə bağlayanda "Pitbull" şəxsi instaqram səhifəsində mənimlə revanş döyüşünə çıxmaq istədiyini yazmışdı. Onunla ancaq kəmər uğrunda döyüşə bilərəm. İdmançı təlim-məşq toplanışlarında artırır. Yaxşı hazırlıq keçib "Pitbulla" daha inamlı mübarizə aparmağa çalışacağam. Onun cavabını gözləyirəm. Razılıq versə, öz planlarımız üzərində işləməyə başlayacağıq. "Bellator"da Qafqazı təmsil edən döyüşçülərlə vuruşmaq istəmərəm. Əslində mənim üçün heç bir fərqi yoxdur. Amma daha çox digər ölkələrdən olan idmançılarla döyüşmək niyyətindəyəm. Qafqazlılarla başqa turnirlərdə qarşılaşmışam. Daha güclü rəqiblərlə üz-üzə gəlmək arzusundayam. Amma lazım gələrsə, Qafqazdan olan idmançılarla da döyüşərəm".

Musayev bu döyüşdən sonra yeni sponsorla müqavilə imzalanacağını istisna etməyib: "Menecerim məsləhət görsə, sözləşmə bağlayacağıq".

Qeyd edək ki, hazırda 32 yaşlı Musayevin hesabında 19 qələbə və 4 məğlubiyyət var.