Həbib Nurməhəmmədovla Konor Makqreqorun cəzası bəlli oldu

Atletika Komissiyası ötən ilin oktyabrında Konor Makqreqor və Həbib Nurməhəmmədov arasında MMA üzrə keçirilən qaydasız döyüşdən sonra baş verən davayla bağlı qərarını açıqlayıb.

Futbolxeber.az saytının məlumatına görə, qurumun ABŞ-ın Nevada ştatında keçirilən iclasında hər iki idmançıya ağır cəza verilib. UFC üzrə yüngül çəkili çempion Nurməhəmmədov 9 ay, Makqreqor isə 6 ay yarışlardan kənarlaşdırılıb. Bundan başqa, rusiyalı idmançı 500 min, irlandiyalı döyüşçü isə 50 min dollar məbləğində cərimələniblər.

Qeyd edək ki, cəzalar ötən ilin oktyabr ayının 6-dan etibarən qüvvədədir. Həmin tarixdə keçirilən döyüşdə Nurməhəmmədov 4-cü raundda rəqibə qarşı boğucu fənd işlədərək, ona qalib gəlmişdi.