"Yuventus" bu gün uduzsa belə, Turinə gəldiyim üçün peşman olmayacağam"

"İdman Azərbaycan" kanalının şərhçisi İsmayıl Abdullayev hazırda Turindədi. İ.Abdullayev İtaliyaya səfəri haqda Futbolxeber.az saytına bunları dedi: "İşdən icazə alıb, Turinə öz hesabıma gəlmişəm. Səfərimin məqsədi sırf "Yuventus" - "Real" matçını canlı olaraq stadiondan izləməkdir. İnşallah, sabah vətənə qayıdacağam. UEFA-ya müraciət etmişdim, onlar da mənə dəvətnamə göndərdilər. Matçı VİP lojadan izləyəcəyəm. Burada dostlar var, azərbaycanlı tələbələr. Sağ olsunlar, məni yüksək səviyyədə qarşılayıb, qonaq etdilər".

İsmayıl Turində gəzdiyi yerlərdən də söz açdı: "Bu gün klubla bağlı ətraflı gəzintidə olacağam. "Yuve"nin muzeyinə baş çəkəcəyəm. Dünəndən isə artıq stadionda bir dəfə olmuşam. Bundan başqa, Po çayını, məşhur Turin qülləsini ziyarət etmişəm".

Həmsöhbətim oyundan öncə təşkil olunan mətbuat konfransında iştirak edə bilməyib. Səbəbini isə belə izah etdi: "Bunun üçün UEFA-ya pul ödəmək lazımdı. Konkret məbləğini bilmirəm. Amma mətbuat konfransında iştirak, şərhçilik yeri, komandaların məşqində iştirak üçün mütləq müəyyən məbləğ ödəməlisən".

"Şər deməsən, xeyir gəlməz. Birdən bu gün "Yuventus" uduzsa, Turinə yollanmağına peşman olmayacaqsan ki" sualını isə İsmayıl belə cavablandırdı: "Əlbəttə ki yox. Bu. mənim uşaqlıq arzumdur. "B" seriyası görmüş adamam. "Yuventus" "B" seriyasında oynayanda belə, gedib oyunlari izləyirdim. Təbii ki kafelərdə".

Tanınmış şərhçi onu da vurğuladı ki, bu gün "Yuventus"un futbolçuları ilə görüşməyə də cəhd edəcək: "Bir azdan stadiona gedəcəyəm. Alınsa, inşallah "Yuve"nin qaldığı otelə getməyi də planlaşdırıram. Qismət olsa, "Yuventus"un futbolçuları ilə də görüşmək istəyirəm".