“Birbaşa Bakı”nın məqsədi təkcə titulu geri qaytarmaq yox, həm də hələ də ən güclü olduğunu sübut etməkdir”

Minifutbol üzrə “Birbaşa Bakı” klubunun təsisçisi İlkin Qəriblinin Futbolxeber.az saytına müsahibəsi

- Ardıcıl çempionluqlardan sonra “Birbaşa Bakı” ötən mövsüm qızıl medalları əldən verdi. Bundan sonra komandada hansı dəyişikliklər oldu?

- Təəssüf ki, ötən mövsüm finalda məğlub olduq və çempionluq titulunu qoruya bilmədik. Amma etiraf etməliyəm ki, rəqibimiz mövsüm ərzində bizdən daha yaxşı çıxış etdi və çempionluğu haqq etdi. Bu baxımdan heç bir bəhanəmiz və ya etirazımız yoxdur.

Komandamızda nəzərdə tutduğumuz dəyişikliklər əsasən daxili məsələlərlə bağlıdır. Xüsusilə nizam-intizam, yanaşma və ümumi komanda mentaliteti üzərində işləmək istəyirik.

Ardıcıl dörd dəfə çempion olduqda bəzən əvvəlki motivasiyanı eyni səviyyədə saxlamaq çətinləşir. Ola bilsin ki, yenidən o qələbə aclığını, o daxili alovu tapmaq üçün bizə məhz belə bir məğlubiyyət lazım idi.

- Çempionlar Liqasında mübarizəni erkən dayandırdınız. Səbəb nə oldu ki, 1/8 finalda məğlub oldunuz, daha irəli gedə bilmədiniz?

- Düşünürəm ki, həmin oyunu izləyən hər kəs nə baş verdiyini yaxşı anlayır. Məğlubiyyəti bəxtsizliklə izah etməyi sevmirəm, amma səmimi deyirəm ki, həmin oyunu 20 dəfə oynasaydıq, fikrimcə, 19-da qalib gələrdik. Təəssüf ki, məğlub olduğumuz o bir oyun məhz həmin günə təsadüf etdi.

Çoxlu qol imkanlarımız oldu, amma onları dəyərləndirə bilmədik. Nəticədə oyun penaltilər seriyasına qədər uzandı və orada məğlub olduq.

Bu da futbolun bir hissəsidir və bunu qəbul etməliyik. Yenə də hər şeyi bəxtsizliklə əlaqələndirmək istəmirəm. Müəyyən qədər bəxtimiz gətirmədi, eyni zamanda öz tərəfimizdən də kiçik çatışmazlıqlar oldu.

Bütün turnir ərzində maksimum yeddi oyun keçirdiyiniz və oyunların çox sıx qrafiklə təşkil olunduğu bir yarışda gözlənilməz nəticələr hər zaman mümkündür. Bəzən bir uğursuz oyun və ya istifadə olunmayan bir neçə qol imkanı bütün turnirdəki çıxışına son qoya bilər.

- Milli səviyyədə iki dəfə Avropa çempionu, bir dəfə dünya çempionu olmuşuq. Amma Çempionlar Liqasını cəmi bir dəfə qazanmışıq. Sizcə, bu, nədən irəli gəlir?

- Məncə, bunun kifayət qədər aydın izahı var. Klub səviyyəsində keçirilən beynəlxalq turnirlərlə milli komandaların iştirak etdiyi yarışların təşkilati səviyyəsi arasında ciddi fərqlər mövcuddur. Məsələn, milli komandaların turnirlərində adətən gündə bir oyun keçirilir. Çempionlar Liqasında isə bəzən bir gündə iki dəfə meydana çıxmalı oluruq. Bu, olduqca böyük amildir.

Digər mühüm məsələ oyun şəraitidir. Milli komandaların yarışları qapalı arenalarda keçirilir və futbolçular birbaşa günəş şüaları, yüksək temperatur kimi çətinliklərlə üzləşmirlər. Klub turnirləri isə açıq havada təşkil olunur. Bəzən 35-40 dərəcə istidə, üstəlik, gündə iki oyun keçirməli olursan. Bütün bunlar futbolçuların fiziki vəziyyətinə, bərpasına və oyunlara hazırlığına ciddi təsir göstərir.

Təşkilati məsələlərin bütün detallarına varmaq istəmirəm, amma hesab edirəm ki, Azərbaycan klublarının özlərindən asılı olmayan kifayət qədər çox amil var. Klublarımız isə əksinə, yüksək səviyyədə mübarizə aparmaq üçün əllərindən gələni edirlər. Bununla belə, biz də bu şərtlərə daha yaxşı uyğunlaşmağın yollarını tapmalıyıq.

- Dünən yeni mövsümün püşkü atıldı. Qarşıdakı çempionatdan gözləntiləriniz nədir?

- Həmişə olduğu kimi, bu mövsüm də məqsədimiz çempion olmaqdır. Biz heç vaxt qarşımıza bundan fərqli hədəf qoymamışıq və bu mövsüm də istisna deyil.

- Demək olar ki, hədəf yalnız titulu geri qaytarmaqdır?

- Xeyr, əlbəttə ki, təkcə bu deyil. Məqsədimiz yalnız çempionluq titulunu geri qaytarmaq yox, həm də hələ də ən güclü komanda olduğumuzu sübut etməkdir. Həmişə olduğu kimi, bunu meydanda göstərmək, yenidən Çempionlar Liqasına vəsiqə qazanmaq və təbii ki, həmin kuboku da qazanmaq istəyirik.

- Yenə əsas rəqib “Zirə” olacaq, yoxsa hansısa sürpriz gözləmək mümkündür?

- Düşünürəm ki, “Zirə” yenə əsas rəqiblərimizdən biri olacaq. “Aznur”u da unutmaq olmaz. Ümumiyyətlə, hesab edirəm ki, çempionatımızın səviyyəsi ildən-ilə yüksəlir. Bu mövsüm iştirakçı komandaların sayı azaldılıb və mən bunu müsbət dəyişiklik kimi qiymətləndirirəm. Adətən komandaların sayı azaldıqda rəqabət daha da güclənir və meydanda göstərilən futbolun ümumi keyfiyyəti yüksəlir. Ümid edirəm ki, bu mövsüm bizim çempionatda da məhz belə olacaq.

- Yeni formatla bağlı düşüncələriniz necədir?

- Edilən dəyişikliklərə çox müsbət yanaşıram və yeni formatı tam dəstəkləyirəm. Hesab edirəm ki, ilk iki yeri tutan komandaların birbaşa yarımfinala vəsiqə qazanması mövsüm ərzində əlavə motivasiya yaradacaq. Bu, komandaları turnir cədvəlində daha yüksək mövqelər uğrunda mübarizə aparmağa həvəsləndirəcək.

Digər çox müsbət məqam isə Naxçıvandan olan regional komandaya yarışda iştirak etmək imkanının verilməsidir. Düşünürəm ki, bu, xüsusilə regionlarda minifutbolun inkişafı baxımından çox yaxşı addımdır. Ümumilikdə, bütün bu dəyişiklikləri tam dəstəkləyirəm və onların çempionatımıza müsbət təsir göstərəcəyinə inanıram.

İbrahim Cəfərov