Təxirə salmalımı, salmamalımı?!.

Son günlər ölkə futbolunda əsas müzakirə mövzusu Azərbaycan Premyer Liqasının 21-ci turunda, fevralın 21-də keçirilməli olan “Neftçi” - “Qarabağ” oyununun təxirə salınıb-salınmamasıdır. Sanki Azərbaycan futbolunda hər şey güllük-gülüstanlıqdır, bircə bu məsələ qalıb. Yaxud da ki, elə təəssürat yaranır ki, guya “Neftçi” bu matçın təxirə salınmasına razılıq versə, “Qarabağ” gedib “Sent Ceyms Park”da “Nyukasl”a beş qol vuracaq... Görünən odur ki, bu söhbəti acı bağırsaq kimi uzatmaq kimlərəsə sərf edir.

Əvvəla, ondan başlayaq ki, Azərbaycan futbolunda bu cür hallar dəfələrlə yaşanıb. Avrokubokdakı vacib matçlardan öncə təxirə salınan oyunlar da olub, təxirə salınmayan da. Lakin matçları təxirə salınan tərəf bundan heç də həmişə xeyir görməyib. Yəni bu gün heç kim təminat verə bilməz ki, “Nyukasl”la cavab oyunundan öncə “Neftçi” ilə matçın baş tutması “Qarabağ”ın ziyanına olacaq. Bəlkə elə xeyrinə oldu, kim bilir...

İkincisi, başda “Qarabağ”ın baş məşqçisi Qurban Qurbanov olmaqla bir çox mütəxəssislər dəfələrlə vurğulayıb ki, Azərbaycan klubları, futbolçular üç gündən bir oynamağa öyrəşməlidirlər. Həftəyə bir oyunla inkişaf etmək mümkünsüzdür. Avropada xalxın uşaqları bəzən həftədə 3 oyuna çıxır e...

Üçüncüsü, “Neftçi” ilə qarşılaşma “Nyukasl”la oyundan öncə deyil ki. İlk oyundan sonradır. Birinci görüş olsaydı, bəlkə də hardasa, matçın təxirə salınmasında israr edənləri başa düşmək mümkün idi. İndiki halda “Qarabağ” “Neftçi” önünə “Nyukasl”la matçdan sonra çıxacaq.

Dördüncüsü, təqvimin sıxlığından, yorğunluqdan gileyləniriksə, yazıq “Nyukasl” neyləsin? “Sağsağanlar” Bakıdakı matçdan sonra tarixi ərzindəki ən uzun uçuş məsafəsini qət edib evə qayıtdacaq və 2 gün sonra, “Mançester Siti” önünə çıxacaq. Aşağı-yuxarı “Qarabağ”ın “Neftçi” ilə oynadığı saatlarda...

Belə təəssürat yaranır ki, “Neftçi” ilə matçın təxirə salınmasını istəyənlər “Qarabağ”ı zəif gözü ilə görənlərdir. Bəli, məhz zəif gözü ilə görənlər. Düşünürlər ki, birdən Ağdam klubu “Neftçi”yə uduzar, çempionluq əldən gedər. Halbuki “Qarabağ” bundan da çətin vəziyyətlərdən məharətlə çıxıb.

Və ən əsası, bu matçın təxirə salmaq “Neftçi”yə qarşı ədalətsizlikdir. “Ağ-qaralar” nəyə görə iki həftə futbolsuz qalmalıdır? “Qarabağ”la görüş təxirə salınsa, fevralın 15-də “Kəpəz”in qonağı olacaq flaqman, bir də fevralın 28-də səfərdə “Şamaxı” ilə üz-üzə gəlməlidir. Mövsümün həlledici bir məqamında “Neftçi” nəyə görə 2 həftə futbolsuz qalmalıdır? Bəli, “Qarabağ” Azərbaycan futbolunda misli görünməmiş uğura imza atıb. Lakin hər klubun öz məqsədləri, hədəfləri var. İstər “Neftçi” olsun, istər “İmişli”, istər “Kəpəz”. Həm də burda adlar nisbidir, sabah eyni durumda başqa klublar da olsa, yanaşma dəyişməməlidir...

Təsəvvür edin, “Neftçi” “Araz-Naxçıvan”ın ardınca “Qəbələ” və “Kəpəz”i də məğlub edir. Ardıcıl 3 qələbə qazanan, əla formada olan “Neftçi” birdən-birə iki həftəlik “istirahətə yollanır”. Bu, hansı məntiqə sığır? Yaxud bu görüş təxirə salınsa, sonraya keçirilməlidir ki, belədə “Neftçi” məcbur qalacaq mövsümün sonuna yaxın, sıx qrafikdə üç gündən bir meydana çıxsın. İndi səmimi deyin, bütün bunlar “Neftçi”yə qarşı ədalətsizlik deyil?!

İBRAHİM

P.S. Gözəl xalq mahnımızın sözlərini bir qədər dəyişsək - “Könlüm istər görəm futbol, üç gündən bir, üç gündən bir”...

P.P.S. Bu dəqiqələrdə mətbuatda oyunun təxirə salındığı barədə xəbər yayılıb. Əgər bu, həqiqətdirsə, o zaman daha heç kim Azərbaycan çempionatında idman prinsiplərinin qorunmasından, şəffaflıqdan, ədalətdən danışmasın!