“Mübariz Mənsimov dedim ki, “Qarabağ”ın uğurlarını Lənkəranda da təkrarlamaq olar”

2005-ci ildə “Xəzər Lənkəran” komandasında oynamış Oktay Derelioğlu klubun fəxri prezident Mübariz Mənsimovla son görüşü barədə danışıb.

Futbolxeber.az saytının məlumatına görə, o, açıqlamanı şəxsi “YouTube” kanalında verib.

Derelioğlu bildirib ki, karyerasındakı son oyunu onun üçün xüsusi əhəmiyyət daşıyıb:

“Son matçımı karyeramda ən sevdiyim iki komandanın – “Beşiktaş” və “Xəzər Lənkəran”ın oyununda keçirdim. O an çox xoşbəxt idim. Bəzən həmin oyunu yenidən izləyirəm. Lənkəran azarkeşlərinə xüsusi münasibətim var, çox çılğın azarkeşlərdir. Düşünürəm ki, məni hələ də unutmayıblar”.

Sabiq futbolçu klubun fəxri prezidenti Mübariz Mənsimovla son görüşündə aralarında maraqlı söhbət olduğunu da qeyd edib:

“Son görüşümüzdə Mübariz bəy dedi ki, klubun fəaliyyəti bərpa olunsa, məni baş məşqçi kimi dəvət edəcəklər. Klubun niyə fəaliyyətini dayandırdığını deyə bilmərəm, amma obyektiv səbəblər var idi. Bununla belə, onda hələ də “Xəzər Lənkəran”a qarşı böyük sevgi olduğunu hiss etdim”.

Derelioğlu əlavə edib ki, Lənkəranda böyük uğurlar qazanmaq mümkündür:

“Ona dedim ki, “Qarabağ”ın əldə etdiyi uğurları Lənkəranda da təkrarlamaq olar”.