Adel Amruş: “Hələ də maşında Azərbaycan musiqisinə qulaq asıram”

Ruanda millisinin baş məşqçisi, daha əvvəl ölkəmizdə “Gənclərbirliyi”ni çalışdırmış Adel Amruşun Futbolxeber.az saytına müsahibəsi

- “Zirə” - “İmişli” oyununu stadiondan canlı izlədiniz. Azərbaycana səfərinizin əsas məqsədi nədir?

- Açığı, bura gəlmək mənim üçün çox yaxşı fürsət oldu. Uzun illərdir Azərbaycanda olmamışdım, bu ölkənin qəlbimdə xüsusi yeri var. Mən 20 il əvvəl burada çalışmışam, Azərbaycanla bağlı çox gözəl xatirələrim və burada çox yaxşı dostlarım var. Heç vaxt insanlarla əlaqəmi kəsməmişdim. Sadəcə iş imkan vermirdi ki, bura gəlim. İndi isə iki məqsəd üçün Azərbaycana gəlmişəm. Birincisi, dostlarımı ziyarət etmək, ikincisi isə milli komanda üçün bəzi futbolçuları canlı izləmək. “Zirə”də oynayan millimizin üzvü Anje Mutsinzi burada oynayır. Ruanda millisində komandanı yeniləyirik və buna görə futbolçularımı real vəziyyətdə görmək istəyirəm. Videoda, ya qəzetdə gördüklərimlə kifayətlənmirəm. Məşqçiləri tanıyıram, insanları tanıyıram, amma futbolçunu canlı görmək mənim üçün çox önəmlidir. Futbolçunun oyununu bir neçə dəqiqəyə qiymətləndirmək mümkündür, amma onunla üz-üzə danışmaq daha da vacibdir.

- Matçdan sonra Mutinsi ilə yanaşı, “Zirə” və “Sabah”ın üzvləri, Mikels qardaşları ilə də söhbətləşdiniz. Mikels qardaşlarını da Ruanda yığmasında görəcəyik?

- Bəli. Mutsinzi hazırda Ruanda millisinin üzvüdür. O, həm yaxşı insan, həm də yaxşı futbolçudur. Mən futbolçularla oyundan əvvəl danışmaq istəmirəm ki, diqqətləri yayınmasın. Məşqçi olaraq həmkarlarımın işinə hörmət edirəm. Onların hazırlıq prosesinə müdaxilə etmək istəmirəm. Mən özüm üçün nə istəyirəmsə, həmkarım üçün də eyni hörməti göstərirəm. Ona görə də futbolçularımla yalnız oyundan sonra danışmağı üstün tuturam. Hazırda Ruanda millisində yenilənmə prosesi gedir. Növbəti Afrika Millətlər Kuboku üçün yeni komanda qururuq. Bu turnirdə iştirak etmək şansımız az idi, amma mən bu ölkəyə gətirildiyim zaman verdiyim sözə sadiq qaldım. Məqsədim və layihəm məhz bu komandadır.

- Bakıya 20 ildən sonra qayıtdınız. Azərbaycanla bağlı təəssüratlarınız necədir? Hansı dəyişiklikləri gördünüz?

- Çox şey dəyişib. Amma dəyişməyən bir şey var: insanların qəlbi. Bu, ən vacib məqamdır. İnsanlar yenə də səmimi, mehriban və gülərüzdür. Yeməkləriniz hələ də möhtəşəmdir. Ölkə çox gözəlləşib. Mən çox xoşbəxtəm.

Əvvəllər də xalqıma Azərbaycan haqqında danışırdım – tarixi, mədəniyyəti, insanları barədə. İndi gələndə isə İçərişəhərdə qaldım, çünki oranı çox sevirəm. Dostlarıma Azərbaycan haqqında danışanda hər zaman insanların ürəyinin böyüklüyünü vurğulamışam. Mən Azərbaycana gəlmələri üçün bir çox insana tövsiyə etmişəm. Heç bir qarşılıq gözləmədən ölkənizin reklamını etmişəm. İnsanlar bura gəlib şəhəri görsünlər deyə onları yönləndirmişəm. İndi bu binaları, bu inkişafı görəndə çox təəccübləndim. Əvvəllər bura tam fərqli idi. Mən bu xalq üçün ən yaxşısını arzulayıram. 20 il əvvəl necə sevirdimsə, bu gün də eyni hissləri daşıyıram. Hələ də o dövrdə çalışdığım futbolçularla əlaqədəyəm – Samir Abdulov, Ruslan Poladov, Namiq Əliyev və digərləri. Mənim üçün bu, yalnız futbol deyildi, insan münasibətləri idi. Bu sevgi ilə gəlmişdim və bu sevgi hələ də qalır.

- Bu illər ərzində Azərbaycandakı insanlarla əlaqəni saxlamısınız?

- Bəli, Azərbaycanda çox insanla münasibətim indi də var. Şəhərdən, bölgələrdən olan dostlarla danışırdım. Fərhad müəllim, İlqar Əliyev və başqaları ilə daim əlaqədəyəmdim. Mən heç vaxt münasibətləri kəsməmişəm. Çünki bu, təkcə futbol deyil, insani bağlardır. Hələ də maşında Azərbaycan musiqisinə qulaq asıram (gülür). Bu ölkəyə ilk gəldiyim vaxtlar asan deyildi, çətin dövrlər idi. Amma indi, şükür Allaha, çox şey dəyişib və inkişaf var. Əvvəl təkcə “Lada”lar idi, indi şəhərdə “Ferrari”, “Lamborgini”, “Maseratti” də görmək mümkündür (gülür).

- Sizcə, nə vaxtsa Azərbaycan millisi dünya çempionatında çıxış edə bilər?

- Xəyal qurmaq gözəldir. Amma realist olmaq lazımdır. Mən futbolçuların keyfiyyətinə inanıram. Problem daha çox davranış və yanaşma ilə bağlıdır. Bunun üzərinə çox getmək istəmirəm. Mən bura Azərbaycan futbolunu mühakimə etməyə yox, öz futbolçularımı izləməyə gəlmişəm.