“Çelsi”nin baş məşqçisi: “Bu cür qollar buraxmaq axmaqlıqdır”

“Düşünürəm ki, oyuna düzgün şəkildə başladıq. Matça nəzarət bizdə idi, amma birinci qolu buraxandan sonra 4-5 dəqiqə içində ikinci qolu da öz qapımızda gördük”.

Futbolxeber.az saytının məlumatına görə, bu sözləri “Çelsi”nin baş məşqçisi Enzo Mareska “Qarabağ”la UEFA Çempionlar Liqası matçından (2:2) sonra keçirilən mətbuat konfransında bildirib.

45 yaşlı italiyalı mütəxəssis etdiyi rotasiyalar barədə də danışıb: “Bunu artıq bir neçə dəfə izah etməyə çalışmışam. Məqsəd Moisesi, Enzonu, Malonu və digər bəzi oyunçuları dincəltmək idi. Onlar hər üç gündən bir oynaya bilməzlər. Klublararası dünya çempionatı bizə çox təsir etdi. Rotasiyanı sınadıq. Qalib gələndə bunu heç kim qeyd etmir, amma uduzanda hamı bunun üzərində dayanır”.

Mareska “Qarabağ” haqda da fikirlərini bölüşüb: “Onlar yaxşı komandadır. Möhtəşəm işlər görürlər. "Qarabağ"a qarşı oynamaq çətin idi”.

O, komandasının səhvlərindən gileylənib: “Bu gün əsas fərq cərimə meydançasında idi. Bu cür qollar buraxmaq axmaqlıqdır. Rəqibin cərimə meydançasında biz kifayət qədər dəqiq deyildik. Mənim üçün əsas fərq budur”.