Riad Rəfiyev: “Oyuna görə layiqli qələbə qazandıq”

“Sumqayıt”ın prezidenti Riad Rəfiyevin Futbolxeber.az saytına müsahibəsi

- Azərbaycan Premyer Liqasının 28-ci turunda “Araz-Naxçıvan” üzərində 1:0 hesablı qələbə qazandınız. Qazanılan 3 xalı necə şərh edərdiniz?

- Erkən qol vurduq. Eləcə də təəssüflər olsun ki, çoxlu qol epizodlarından istifadə edə bilmədik. İkinci qolu vursaydıq, daha rahat olardıq. İstənilən halda 1:0 da 3 xal üçün kifayətdir. Komandanı təbrik edirəm. Artıq növbəti oyuna köklənməliyik.

- Penalti epizodu ilə bağlı narazılıqlar var. Buna münasibətiniz necədir?

- Epizodun təkrarına baxmamışam (söhbət oyundan dərhal sonra olub - red.). İzlədikdən sonra fikir bildirmək olar. Amma məncə, oyuna görə layiqli qələbə qazanmışıq. Yenə deyirəm, xeyli qol epizodundan istifadə edə bilmədik.

- Hazırda dördüncü pillədə qərarlaşsanız da, ikinci yerdən cəmi 1 xal geri qalırsınız. “Sumqayıt”ın avrokuboklara vəsiqə qazanmaq şansını necə dəyərləndirirsiniz?

- Çempionat çox gərgin keçir. Xal durumu elədir ki, bir oyunda uduzsan, beşinci-altıncı pilləyə düşə bilərsən. Bir matçda qələbə qazansan isə əksinə, ikinci-üçüncü pilləyə yüksəlmək mümkündür. Ona görə də indidən nəsə demək çətindir.

- Bu məğlubiyyətdən sonra demək olar ki, böyük ölçüdə “Araz-Naxçıvan” avrokuboklar mübarizəsindən ələndi. Qaldı “Neftçi”, “Zirə”, “Sabah”, “Səbail” və “Turan Tovuz”. Avrokuboklar uğrunda mübarizədə “Sumqayıt” üçün bu kollektivlərdən hansıları əsas rəqib qismində görürsünüz?

- Ad çəkə bilmərəm. Məncə, “Sumqayıt” da daxil olmaqla adını çəkdiyiniz bütün klubların qitə kuboklarına yüksəlmək şansı var. Mövsümün sonuna 8 tur qalıb. Bu gedişlə bəlkə də hər şeyə son turda aydınlıq gəldi.

- Növbəti oyunda “Neftçi” ilə qarşılaşacaqsınız...

- Çox maraqlı və gərgin bir matç olacaq. Məncə, hər iki tərəf qələbəyə oynayacaq. İnanıram ki, komandamız bu dəfə də səfərdə “Neftçi”yə qarşı yaxşı təsir bağışlayacaq.

- Həftə arası “Neftçi”ni “Qarabağ”la çətin kubok oyunu gözləyir. Bu məqamı “Sumqayıt” üçün üstünlük hesab etmək olar?

- Düşünmürəm. Çünki “Neftçi”nin zəngin heyəti var. Oyunçu seçimi genişdir və buna görə də hər hansı problem yaşayacaqlarına inanmıram.

- Aprelin 2-də AFFA prezidentliyinə seçkilər keçiriləcək, eləcə də İcraiyyə Komitəsinin yeni tərkibi formalaşacaq. Yeni AFFA rəhbərliyindən gözləntiləriniz nədir?

- Nə olur olsun, əsas odur ki, Azərbaycan futboluna xeyirli olsun.

Fərəc ASLANOV