25 Iyun 2024, Çərşənbə axşamı
"Qəbələ"də yeni məşqçi təyinatı
"Şamaxı"da portuqaliyalı qapıçı
Eddi “Neftçi”dən niyə getdi?
"Turan Tovuz"dan yeni transfer

Ölkə futbolu

Ruslan Abışov: “Ən böyük təəssüf hissini “Neftçi”dən gedişimdə yaşadım”

“Neftçi” - “Zenit” oyununda futbolçu karyerasını başa vuran Ruslan Abışov görüşün fasiləsində Futbolxeber.az saytının suallarını cavablandırıb.

 

- “Zenit”lə yoldaşlıq matçında son dəfə futbolçu kimi meydana çıxdın. Təəssüratların necədir?

- Futbolla sağollaşmaq çox çətindir. Başa düşürəm ki, hər şeyin bir sonu var. Mən də buna hazır idim. Amma dildə deməklə olmur. Meydana çıxarkən artıq duyğusal anlar yaşadım. “Neftçi” rəhbərliyinə, bu işdə əməyi olan hər kəsə təşəkkür edirəm. Məni futbola qazandıran “Neftçi” olub. Artıq futbolçu yox, azarkeş kimi həmişə komandanın  yanındayam. Nə vaxt etimad göstərilsə, var gücümlə “Neftçi”yə kömək etməyə hazıram.

- Meydana çıxarkən gözündə nələr canlandı?

- Özümü saxlaya bilmədim, kövrəldim. Meydanda çox çətin idi o hissləri yaşamaq. İlk oyuna necə çıxmışdımsa, bu gün də eyni həvəs, istək var idi. Bütün xatirələr gözümdə canlandı. Bir futbolçunun ən ağır günü karyerasını başa vurduğu günün ertəsidir. Səhər yuxudan duranda anlayırsan ki, daha məşq yoxdur. Özümü buna nə qədər hazırlasan da, çətindir. Amma karyeramdan narazılıq edə bilmərəm. Futbol sayəsində çox şey əldə etmişəm. Mənim, ailəmizin həyatını dəyişib.

- Qeyd etdiyin kimi, futbolda çox şey əldə etmisən. Bu illər ərzində ən çox yaddaqalan və ən çox təəssüfləndiyin nələr olub?

- Karyeram ərzində çempionluqlar əldə etmişəm. Ən böyük təəssüf hissini “Neftçi”dən gedişimdə yaşadım. Çünki bir ay sonra komanda Azərbaycan tarixində ilk dəfə olaraq Avroliqanın qrup mərhələsinə düşdü. Həmin vaxt depressiyaya düşmüşdüm, heç cür özümə gələ bilmirdim. Təsəvvür et ki, kapitan olduğun komanda Avroliqanın qrupuna düşür, sənsə bütün bunları televizordan izləyirsən.

- “Neftçi”dən “Xəzər Lənkəran”a gedişin bu gün də müzakirə edilir. Sırf həmin məqama görə bugünkü vida matçına qarşı çıxan azarkeşlər də var idi...

- Azarkeşləri başa düşürəm. Onların fikirlərini normal qarşılayıram. Kapitanın əzəli rəqibin heyətinə keçməsinə heç kim razı olmazdı. Amma həmin transfer məndən asılı olmayan səbəblərdən baş tutmuşdu. Daha sonra “Neftçi” azarkeşləri ilə bu barədə söhbətimiz oldu. Onlar da məni anlayışla qarşıladılar. Yenidən komandaya gələrkən də fanatların dəstəyini hiss edirdim. Bu gün də məni görmək üçün stadiona gələn hər kəsə minnətdaram. Azarkeşlərin şəkil çəkdirməsi, avtoqraf paylamaq çox xoş idi. “Neftçi”dəki hər kəsə minnətdaram. Bu gün hamı ilə halallaşdım, sağollaşdım. “Neftçi”də məndən də titullu futbolçular olub. Bu gün “Neftçi”də bir ənənənin bəlkə də əsası qoyuldu. İnanıram ki, gələcəkdə digər futbolçular üçün də vida oyunu keçiriləcək. Çünki hər futbolçu karyerasını doğma klubunda bitirməyi istər. Bu ideyanı verən, reallaşmasında payı olan hər kəsə təşəkkürümü bildirirəm.
- Maraqlıdır ki, karyeran ərzində bir çox aparıcı klublarda çıxış etsən də, səni heç vaxt “Qarabağ”da görə bilmədik. Bunun xüsusi bir səbəbi var?

- “Rubin”də olarkən “Qarabağ” söhbəti olmuşdu. Vətənə qayıdarkən Ağdam klubundan təklif var idi. Amma yekunda “Qəbələ”yə keçəsi oldum.

- Yeri gəlmişkən, karyeranı bitirdiyini feysbukda elan etdin. Həmin vaxt “Neftçi” ilə vidalaşmaq ideyası yox idi. Sonradan nə baş verdi?

- Həmin paylaşımdan sonra “Neftçi”dən mənə zəng gəldi. Belə bir təklif irəli sürdülər. Mənim üçün gözlənilməz, amma çox xoş oldu. Məhz “Zenit”lə oyunda vida matçımın keçirilməsi çox xoş idi. Dünən oyundan əvvəl də çağırdılar, komanda ilə birgə şəkil çəkdirdik. Çox yaxşı vida mərasimi oldu.

- Bundan sonra Ruslan Abışovu hansı sahədə görəcəyik?

- Futbolun içində olacam. Futbolsuz yaşamaq qeyri-mümkündür. Düzdür, fərdi məşq edirəm, minifutbol oynayırıq. Futbolda olacam, amma hansı sahədə olacağımı zaman göstərəcək.

- Belə başa düşdüm ki, məşqçi, yaxud funksioner kimi çalışacağını hələ müəyyənləşdirməmisən?

- Məşqçi kurslarına yazılacam. Amma funksioner kimi çalışmağım da mümkündür. Hər iki sahədə təhsil almağa çalışacam. Gerisi artıq futbol rəhbərlərindən asılıdır (gülür)). AFFA, ya “Neftçi” olsun, fərqi yoxdur. Hansı təklif olsa, ən yaxşı şəkildə özümü göstərəcəyimə inanıram.

İbrahim CƏFƏROV




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

Iyun 2024
B.eÇ.aÇC.aCŞB
01 02
03 04 05 06 07 08 09
10 11 12 13 14 15 16
17 18 19 20 21 22 23
24 25 26 27 28 29 30