“De Byazi ilə aramızda inciklik olduğunu düşünmürəm” - AÇIQLAMA

“Bu sual mənə çox verilir. peşəkar futbolçu olaraq daim öz oyunumu fikirləşirəm. Stabil çıxış edirəm. İlk məqsədim öz komandama xeyir verməkdir”.

Futbolxeber.az saytına müsahibəsində bu sözləri “Turan Tovuz”un müdafiəçisi Şəhriyar Əliyev deyib.

Milliyə dəvət almaması geniş müzakirə olunan təcrübəli futbolçu seçimin baş məşqçiyə aid olduğunu bildirib: “Millinin baş məşqçisi oyunlara baxaraq seçim aparır. Seçim ona məxsusdur, mənim işim futbol oynamaqdır”.

“De Byazi daha sizi milliyə dəvət etmişdi. Bəlkə həmin vaxt aranızda nəsə inciklik olub?” sualını Ş.Əliyev belə cavablandırıb: “İnciklik olduğunu düşünmürəm, belə bir şey yadıma gəlmir. Baş məşqçi seçimləri özü edir. Milli komandaya yenidən dəvət alsam, bu, məni sevindirər. Yığmada oynamaq hər futbolçunun arzusudur”.

O, klubunda oynamayan bəzi futbolçuların yığmaya dəvət almasına fikir bildirmək istəməyib: “Hansısa futbolçu haqqında danışmağım düzgün olmaz. Seçimi De Byazi özü edir. Bu, onun qərarıdır”.

Şəhriyar Əliyev Belçika ilə oyunun millimiz üçün çox ağır keçəcəyini vurğulayıb: “Rəqibimiz çox güclüdür. Belçika kimi millilər çalışırlar ki, belə oyunlarda xal itirməsin. Millimiz üçün ağır oyun olacaq. Futbolçulara uğurlar arzulayıram. Yaxşı nəticə qazanmaqlarını istəyirəm”.

Azad NURİYEV