“Neftçi” Regekampfa 100 min avro təzminat ödəməlidi?

Rumıniya mətbuatı "Neftçi"nin baş məşqçisi Laurensio Regekampfla bağlı yeni iddia irəli sürüb.

Futbolxeber.az-ın məlumatına görə, bu ölkənin prosport.ro saytı rumın mütəxəssisin vəzifəsini itirmək təhlükəsi ilə üzləşdiyini yazıb. Buna səbəb kimi onun rəhbərliyi altında "Neftçi"nin bu mövsüm titul qazana bilməməsi göstərilib.

İddia edilir ki, "Neftçi" rəhbərliyi Rege ilə yolları ayırmağı düşünür, amma ona təzminat ödəmək istəmir. Saytın yazdığına görə, onunla imzalanan müqavilədə belə bir bənd var ki, sənəd vaxtından əvvəl, birtərəfli qaydada pozularsa, bu halda məşqçiyə 100 min avro cərimə ödənməlidir.

"Universitet Krayova"nın sabiq baş məşqçisi azərbaycanlı klub rəhbərlərinə bildirib ki, onu istədikləri vaxt qova bilməzlər. Rege onlara deyib ki, təzminatda endirim etmək niyyətində deyil", - deyə sayt yazıb.

Ötən ilin yayında "Neftçi"yə keçən Regenin Bakı klubu ilə müqaviləsi 2024-cü ilin yayında başa çatır.