Qurban Qurbanov: “Bu təklifə ən sıx qrafikdə belə yox deməzdik”

“Bizim üçün çox vacib oyun idi. Həm yaxşı oyun göstərmək, həm də 3 xal qazanmaq istəyirdik. Şükürlər olsun ki, istəyimizə çatdıq”.

Futbolxeber.az saytının məlumatına görə. bu sözləri Azərbaycan Premyer Liqasının 27-ci turunda “Sumqayıt”la oyundan sonra “Qarabağ”ın baş məşqçisi Qurban Qurbanov deyib.

Təcrübəli mütəxəssis komandasının 6:0 hesablı qələbəsini belə şərh edib: “İlk 2 qoldan sonra oynamaq bizim üçün daha rahat oldu. Vacib olan məqam oyunumuzu, futbolçuların idman formasını yaxşılaşdırmaqdı. Bu gün futbolçularım meydanda həm məsuliyyətli, həm də istəkli idilər. Buna görə komandamı təbrik edirəm. “Sumqayıt” isə qarşıdakı matçlarda uğurlar arzulayıram. Öz azarkeşlərimizə də, sumqayıtlı fanatlara da təşəkkürümü bildirirəm”.

Mütəxəssis “Qalatasaray”la xeyriyyə oyunu üçün hələlik digər klublara futbolçu ilə bağlı müraciət etmədiklərini bildirib və bunun səbəbini belə izah edib: “Hesablamamıza görə, həmin vaxt düşərgəmizdə 12 futbolçu qalmalıdı. Bu matçdan sonra martın 19-na kimi futbolçulara istirahət verəcəyik. Bir araya gələndə, martın 19-da  Benzianın, Diakabinin durumuna aydınlıq gələcək. Hələlik hər ikisi fərdi məşq edir. Lakin həmin vaxt komanda ilə çalışmalara başlamalıdılar. Bu cür məqamları da gözləməliyik. Ola bilər ki, 2-3 gün qalmış digər klublara müraciət edək. Konkret olaraq, müdafiə xəttində futbolçuya ehtiyacımız var. Çünki bu mövqedə cəmi 3 futbolçumuz qalacaq: Kevin, Rahil və Maksim. Bildiyim qədəri ilə Elvin, Toral və Bəhlul milliyə dəvət alıb. Bədavi isə zədəlidi. Bir sözlə, müdafiədə problemlər görünür. Ona görə də ola bilər ki, 2, hətta 3 müdafiəçi üçün digər klublara müraciət edək. Yenə də qarşıdakı məşq proseslərindən çox şey asılıdı. Vəziyyətə uyğun olaraq digər mövqelərdə də futbolçuya ehtiyac duya bilərik”.

Qurbanov Nəriman Həsənzadəni “Qalatasaray”la oyunda müdafiədə sınamaq fikrində olmadığını bildirib: “Bəli, bu gün Nərimandan müdafiədə yararlandıq. Amma bu, “Qalatasaray”la oyuna görə deyil. Maksimin qızdırması var idi. Ona görə də bu gün heyətdə yer almamışdı. Maksimlə bağlı problem olmasaydı, Nərimanı həmin mövqeyə qoymazdıq. Üstəlik, Marko Veşoviç, Elvin Cəfərquliyevə bir qədər istirahət vermək istədim. Həsənzadə bacarıqlı futbolçudu. Gücü, sürəti var və hər mövqedə minimum tapşırığı yerinə yetirməyə çalışır”.

Qurban Qurbanov bombardirlik yarışında Nikolas Kanalesin 9 il əvvəlki 26 qolluq rekordunu yeniləmək üçün Musa Qurbanlıya gələcəkdə penalti vurmaq şansı tanımayacağını bildirib: “Yox, bir dəfə şans verdim, amma daha verməyəcəm” (gülür).

O, “Qalatasaray”la 26 martda deyil, başqa tarixdə, tam heyətlə qarşılaşmaq istərdinizmi” sualını belə cavablandırıb: “Şərtlə hər ikimiz üçün eynidir. Onların da bəzi futbolçuları milli komandaların düşərgəsində olacaq. Amma belə baxanda “Qalatasaray”da oynamayanlar daha adlı-sanlı futbolçulardı. Biz tərəfdən ciddi problem görmürəm. Təbii ki, tam heyətin sərəncamımda olmasını istərdim. Lakin bu, elə bir oyundur ki, biz bu təklifə ən sıx qrafikdə belə yox deməzdik. Çünki bilirsiniz ki, bu matçdan əldə olunacaq gəlir zəlzələdən zərər görən insanlara göndəriləcək. Onu da unutmayaq ki, “Qalatasaray” kimi böyük klubların hər dəfə boş vaxtı olmur. Bəlkə də oyunun məhz indi keçirilməsi hər iki tərəf üçün daha faydalıdı”.

Qurban Qurbanov “Qalatasaray”a qarşı yaxşı oyun sərgiləmək istədiklərini bildirib: “Deməzdim ki, nəticə önəmli olacaq. Amma “Qalatasaray”a qarşı yaxşı oyun sərgiləmək istəyirik. Komanda bunun arzusudur. Çalışacağıq ki, yaxşı oyunla azarkeşlərimizi sevindirək, hər iki tərəfin fanatları razı qalsınlar. Məncə, Türkiyədən azarkeşlər gəlməsə belə, stadiona toplaşanların yarısı “Qalatasaray” azarkeşi olacaq. Bilirəm ki, ölkəmizdə “Qalatasaray” fanatlarının sayı çoxdu”.