“Sumqayıt”ın “Qarabağ”la 34-cü dueli

“Qarabağ” futbol üzrə Azərbaycan Premyer Liqasının 16-cı turunda səfərdə “Sumqayıt”la qarşılaşacaq.

Futbolxeber.az saytının məlumatına görə, bu, tərəflərin cari mövsümdə üçüncü qarşılaşması olacaq.

Mövsümün Sumqayıtda baş tutan ilk duelində məhsuldar heç-heçə qeydə alınıb - 2:2. Ağdam klubu “Azersun Arena”da rəqibini qəbul etdiyi görüşdə isə 6:1 hesablı qələbə qazanıb.

Bu qarşılaşma komandaların çempionatda 34-cü oyunu olacaq. Əvvəlki oyunların 24-də Ağdam klubu, 5-də Sumqayıt təmsilçisi qələbə qazanıb. 4 görüşdə isə heç-heçə qeydə alınıb. Top-fərqində də “Qarabağ” böyük fərqlə öndədir - 73-17.

Qeyd edək ki, fevralın 19-da Sumqayıtdakı “Kapital Bank Arena”da keçiriləcək matçın start fiti saat 18:00-da səslənəcək.