Sudamerikano kubokunda dava: 5 qırmızı vərəqə, artırılmış 22 dəqiqə

Cənubi Amerikanın ikinci dərəcəli klub turniri olan Sudamerikano kubokunun oyununda dava düşüb.

Futbolxeber.az saytının məlumatına görə, insident 1/16 final mərhələsinin cavab oyunu çərçivəsində Peruda keçirilən "Universitario" - "Korintians" (1:2) matçında yaşanıb.

Belə ki, Braziliya klubunun üzvü Ryan 90+2-ci dəqiqədə komandasının qələbə qolunu vurduqdan sonra sevincini çılğın şəkildə azarkeşlərlə birgə qeyd edib. Bu isə yerli komandanın üzvlərinin xoşuna gəlməyib. Nəticədə meydanda qarşıdurma yaranıb. Yekunda hakim qonaqlardan 2 (Ryan, Araujo), meydan sahiblərindən isə 3 (Kalkaterra, Di Benedetto, Quzman) futbolçunu qovub. Meydandakı qalmaqal səbəbindən kolumbiyalı referi görüşün ikinci hissəsinə 22 dəqiqə artırıb.

Qeyd edək ki, 2 oyunun nəticəsinə görə 3:1 hesablı qələbə qazanan "Korintians" 1/8 finala yüksəlib.