Xarici futbol

ÇL-in yeni mövsümün keçirilmə qaydası açıqlandı

Şriftin ölçüsü:

27.02.2018 16:20

UEFA 2018-2019 mövsümündə Avropa kuboklarının keçirilmə sistemini açıqlayıb.

Gələn mövsüm Çempionlar Liqasında qrup mərhələsinə 26 klub birbaşa vəsiqə əldə edəcək.

Təsnifat mərhələsindəki hər bir komanda isə Avropa Liqasında oynamaq üçün ikinci şans qazanacaq.

17 komanda Avropa Liqasının qrup mərhələsinə birbaşa vəsiqəyə yiyələnəcək. Qalan 31 klubdan 10-u Çempionlar Liqasının "pley-off", 21-i isə iki müxtəlif istiqamət - Çempionlar Liqası və Avropa Liqasından gələcək.

Çempionlar Liqasının təsnifat mərhələsi üçün "uduzan çıxır" prinsipi üzrə mini-turnir, Avropa Liqası üçün isə ev-səfər prinsipi üzrə ilkin mərhələ təşkil olunacaq.

Qrup mərhələsinin formatı dəyişməyəcək. Lakin Çempionlar Liqası və Avropa Liqasının oyunları üçün başlama saatı Avropa vaxtı ilə 18:55 (Bakı vaxtı ilə 20:55 və ya 21:55) və 21:00 (23:00 və ya 24:00) müəyyənləşdirilib.

Çempionlar Liqasının qrup mərhələsinə birbaşa vəsiqələrin sahibləri bunlar olacaq:

Çempionlar Liqasında 2017-2018 mövsümünün qalibi (1);

Avropa Liqasında 2017-2018 mövsümünün qalibi (1);

UEFA reytinqində ilk 4 yeri tutan İspaniya, Almaniya, İngiltərə və İtaliya hərəyə 4 komanda ilə (16);

UEFA reytinqində 5-6-cı yerləri tutan Fransa və Rusiya hərəyə 2 komanda ilə (4);

UEFA reytinqində 7 - 10-cu yerləri tutan Portuqaliya, Ukrayna, Belçika və Türkiyə hərəyə 1 komanda ilə (4)

Çempionlar Liqasının qalibi daxili çempionatında tutduqları yer vasitəsilə qrup mərhələsinə vəsiqə qazanarsa, vakant vəsiqə UEFA reytinqində 11-ci yeri tutan (Çexiya) ölkənin təmsilçisinə veriləcək. Həmin komanda Çempionlar Yolundan mübarizəyə qoşulacaq;

Avropa Liqasının qalibi daxili çempionatdan da qrup mərhələsinə vəsiqə qazanarsa, vakant vəsiqə UEFA reytinqində 5-ci yeri tutan (Fransa) ölkənin 3-cü komandasına veriləcək. Həmin komanda Liqa yolundan mübarizəyə qoşulacaq;

Qrup mərhələsində maksimum 5 klubla təmsil olunmağa icazə veriləcək.

Çempionlar Yolu (4 vəsiqə)

Bu yolla 11-ci yerdən aşağı pillələrdə qərarlaşmış milli assosiasiyalar ilkin, 3 seçmə mərhələ və pley-offu keçməklə, vəsiqə qazana biləcəklər.

İlkin mərhələ: "Uduzan-çıxır" prinsipi üzrə mini-turnirdə 4 komanda çıxış edəcək;

I təsnifat mərhələsi: 33 komanda və ilkin mərhələnin qalibi çıxış edəcək;

II təsnifat mərhələsi: 3 komanda və I təsnifat mərhələsinin 17 qalibi;

III təsnifat mərhələsi: 2 komanda və II təsnifat mərhələsinin 10 qalibi;

Pley-off: 2 komanda və III təsnifat mərhələsinin 6 qalibi.

İlkin mərhələdən III təsnifat mərhələsinədək keçirilmiş qarşılaşmalarda uduzan bütün komandalara Avropa Liqasında uğur qazanma şansı veriləcək. Burada onlar Avroliqanın müvafiq mərhələsində Çempionlar Yolunda çıxış edəcəklər. Pley-off mərhələsində mübarizəni dayandıranlar Avroliqanın qrup mərhələsinə avtomatik vəsiqə qazanacaqlar.

Liqa Yolu (2 vəsiqə)

Burada UEFA reytinqində 5-6-cı yerləri tutan ölkələrin 3-cü komandaları, habelə, 7 - 15-ci yerlərdəki ölkələrin vitse-çempionları çıxış edəcək. Ümumilikdə 3 seçmə mərhələ keçiriləcək:

II təsnifat mərhələsi: 6 komanda;

III təsnifat mərhələsi: 5 komanda və II təsnifat mərhələsinin 3 qalibi;

Pley-off: III təsnifat mərhələsinin 4 qalibi.

II təsnifat mərhələsində uduzanlar mübarizəni Avropa Liqasının Liqa yolu üzrə III təsnifat mərhələsində davam etdirəcəklər. III təsnifat mərhələsində və ya pley-offda uduzanlar birbaşa Avropa Liqasının qrup mərhələsinə vəsiqə əldə edəcəklər.

Qeyd edək ki, Azərbaycan Çempionlar Liqasının II təsnifat mərhələsindən etibarən Çempionlar Yolu üzrə mübarizəyə başlayacaq.

sportnet.az

Xəbəri paylaş