"Rəvan"ın futbolçusunu Tunisdə məyus etdilər

"Rəvan” futbol klubunun üzvü Samuel Barlayın təmsil etdiyi Syerra Leonenin əsas millisindən dəvət aldığını xəbər vermişdik. Futbolxeber.az-ın məlumatına görə, artıq mütəmadi olaraq yığma komandaya cəlb olunan yarımmüdafiəçi növbəti oyuna çıxıb.

 

Belə ki, Barlay 2014-cü ildə Braziliyada keçiriləcək dünya çempionatının seçmə turniri çərçivəsində Syerra Leone milli komandasının Tunislə görüşündə iştirak edib. İsveçlı baş məşqçi Lars-Olof Mattsson "Rəvan"ın üzvünə 90 dəqiqə boyunca güvənib. Samuel isə komandasının meydandakı ən fəal üzvlərindən biri, bəlkə də birincisi olub.

 

Oyuna gəlincə, Radesdə baş tutan qarşılaşmada Tunis 2:1 hesabı ilə qalib gələrək dünya çempionatının final mərhələsinə doğru daha bir addım atıb. İndi 3 turdan sonra Tunis milli komandasının hesabında 9 xal var. Syerra Leone və Ekvatorial Qvineye yığmaları isə 4 xalla 2-3-cü yerləri bölüşür. Onu da qeyd edək ki, Barlayın komandası seçmə turnirdə növbəti oyununu iyunun 7-də keçirəcək: təxminən iki ay yarımdan sonra Syerra Leone evdə məhz Tunis millsini qonaq edəcək.