Avro-2019: Millimizin 1/8 finaldakı rəqibi müəyyənləşdi

Ankara, Lodz, Budapeşt və Bratislavada təşkil olunan qadın voleybolçular arasında Avropa çempionatında qrup mərhələsinə yekun vurulub və 1/8 finalda qarşılaşacaq cütlüklər müəyyənləşib.

Futbolxeber.az saytının məlumatına görə, C qrupunu ikinci yerdə tamamlayan Azərbaycan yığması 1/8 finalda A qrupunun üçüncüsü - Bolqarıstanla üz-üzə gələcək. Görüş sentyabrın 1-də, Budapeştdə keçiriləcək.

Qeyd edək ki, Bolqarıstan millisi A qrupunu 6 xalla üçüncü yerdə tamamlayıb. İlk 3 görüşündə (Fransa 2:3, Serbiya 1:3, Türkiyə 1:3) uduzan bolqarlar son 2 görüşdə qələbə qazanmaqla (Yunanıstan 3:0, Finlandiya 3:0) 1/8 finala adlayıblar.

Yığmamız 1/8 finalda qələbə qazansa, 1/4 finalda Serbiya - Rumıniya cütünün qalibi ilə üz-üzə gələcək. Həmin matç sentyabrın 4-də Ankarada oynanılacaq.

Əlavə edək ki, Avropa çempionatının 1/8 final mərhələsindəki digər 6 cütlük belədir:

İtaliya - Slovakiya

Rusiya - Belçika

Türkiyə - Xorvatiya

Hollandiya - Yunanıstan

Polşa - İspaniya

Almaniya - Sloveniya