Canninin gəlişindən sıxılan canlar

Dünən FIFA-nın prezidenti Canni İnfantino tarixdə ilk dəfə keçiriləcək U-15 Dünya Çempionatı və Festivalı 2026-ya hazırlıq çərçivəsində Azərbaycana səfərə gəldi. Səfər çərçivəsində o, Azərbaycan Prezidenti cənab İlham Əliyevin qəbulunda oldu, eləcə də AFFA prezidenti Rövşən Nəcəflə görüşdü və FIFA U-15 Dünya Çempionatı və Festivalının oyunlarının keçiriləcəyi Hövsan qəsəbəsində inşa olunan futbol bazası ilə tanış oldu.

COP-29 zamanı Bakıya səfərində olduğu kimi, bu dəfə də FİFA prezidentini qurumda Üzv Assosiasiyaların direktoru vəzifəsini tutan Elxan Məmmədov müşayiət edirdi. AFFA-nın sabiq baş katibinin ölkə başçısı ilə görüşdə iştirakı, ali futbol qurumunun rəhbəri kimi Bakıya gəlişi yenə bəzilərinin kefinə soğan doğrayıb. Millinin hər uğursuz oyunundan sonra özünü təmizə çıxarmaq üçün Azərbaycan futbolundakı bütün problemləri keçmiş AFFA rəhbərliyinin üzərinə atanların yuxusu dünəndən ərşə çəkilib. Əslində bu, ilk belə hal deyil. Məmmədovun demək olar ki, ölkəyə hər gəlişi onun xələflərinin kefini pozur. Maraqlıdır, bu antipatiyanın kökündə nə dayanır? Axı “Azərbaycan futbolunu məhv edir” dediyiniz Məmmədov artıq bir neçə ildir AFFA-da yox, FİFA-da çalışır. Tamam, sabiq baş katibin dövründə Azərbaycan futbolunda vəziyyət ürəkaçan deyildi. Bəs indi? Guya AFFA-da prezident, yaxud baş katib dəyişikliyindən sonra futbolumuz irəli gedib? Halbuki reallıqda görünən odur ki, son illərdə futbolumuz daha da geriləyib. Əvvəlki AFFA rəhbərliyinin dövründə məgər millimiz D Liqasında idi? Yoxsa FİFA reytinqində 126-cı yerə düşmüşdü? Rövnəq Abdullayevin prezident, Elxan Məmmədovun da baş katib olduğu dövrdə Bakıda və bölgələrdə bir neçə stadion tikildi. Hazırkı AFFA rəhbərliyinin dövründə neçə stadion inşa olunub? Sıfır. Özü də nəzərə almaq lazımdır ki, AFFA-nın büdcəsi son illərdə daha da artıb və heç vaxt olmadığı qədər yüksək həddə çatıb. Stadion tikmək bir yana, AFFA-nın balansında olan “Dalğa Arena” bu yaxınlarda “Sabah”a satıb. Bu da sizə inkişaf...

Yaxşı, siz haqlısınız, Elxan Məmmədov zəif idarəçi idi. Bəs sizin dövrünüzdə Azərbaycan futbolu hansı uğurlara imza atıb? Bəlkə onun gedişindən sonra millimiz Dünya və Avropa çempionatlarının final mərhələsində oynayıb, xəbərimiz yoxdur?

Bu qədər kin-küdurət nəyə lazımdır axı? FİFA kimi mötəbər qurumda azərbaycanlının rəhbər vəzifə tutmasının nəyi pisdir ki? Bunun Azərbaycan futboluna yalnız və yalnız xeyiri var. Odur ki, növbəti uğursuzluqda (Allah gecindən versin) yeni bəhanə fikirləşin. Onsuz da daha heç kim “bütün günahlar Elxan Məmmədovadır” nağılına inanmayacaq. Camaat çörəyi qulağına yemir. Kor-kor, gör-gör... Artıq vaxtı ilə ona müxalif olanlar belə “Elxan Məmmədovun dövrü daha yaxşı idi” fikrini səsləndirirlər.

İBRAHİM