Şahmatçılarımızın dünya reytinqindəki mövqeyi açıqlandı

Beynəlxalq Şahmat Federasiyası - FİDE oktyabr ayı üzrə yeni reytinq cədvəlini açıqlayıb.

Futbolxeber.az saytının məlumatına görə, Azərbaycan şahmatçıları arasında ən yüksək nəticə Şəhriyar Məmmədyarova məxsusdur. 2710 xala malik qrossmeyster dünya reytinqində 29-cu sırada yer alıb.

Teymur Rəcəbov 2689 xalla 38-ci, Aydın Süleymanlı 2679 xalla 41-ci, Məhəmməd Muradlı 2662 xalla 53-cü, Rauf Məmmədov isə 2632 xalla 89-cu pillədə qərarlaşıb.

Qadın şahmatçıların reytinqində isə Ülviyyə Fətəliyeva 2395 xalla 55-ci, Gövhər Beydullayeva 2392 xalla 57-ci, Xanım Balacayeva 2357 xalla 83-cü, Günay Məmmədzadə 2348 xalla 93-cü yerdədir.

Kişilərin siyahısına 2823 xalla norveçli Maqnus Karlsen, qadınların reytinqinə isə 2596 xalla çinli Yifan Hou başçılıq edir.