“İspaniya ilə oyunu səbirsizliklə gözləyirik” LAYİHƏ

“İspaniya ilə oyunu səbirsizliklə gözləyirik. Qarşıdakı 2 matç bizim üçün çox vacibdir”. Futbolxeber.az saytına müsahibəsində bu sözləri AFFA-nın baş katibi Elxan Məmmədov deyib.

Kolumbiyada keçirilən futzal üzrə dünya çempionatında Azərbaycan yığması bu gecə İspaniya ilə qarşılaşacaq. Baş katib qeyd edib ki, yığmamız ispanlardan xal ala bilər: “İspaniya güclü rəqibdir. Matçın çətin keçəcəyi hər kəsə məlumdur. Ümid edirəm ki, futzalçılarımız bu gün bizi sevindirəcəklər. Yığmamızın uğur qazanmaq üçün potensialı var. İlk oyunda komandamız gücünü göstərdi. Mərakeş üzərində 5:0 hesablı qələbə qazandıq. Qapımızı toxunulmaz saxladıq. Bu nəticə bizi sevindirdi. İndi eyni uğuru ispanlarla görüşdə gözləyirik”.

Elxan Məmmədov bildirib ki, millimizin ilk hədəfi mundialda qrupdan çıxmaqdır: “Bu, dünya çempionatıdır. Hər oyuna diqqətlə yanaşmaq lazımdır. Komandamızın ilk məqsədi qrupdan çıxmaqdır. Millimiz 1/8 finala adladıqdan sonra növbəti mərhələ üçün əsas hədəfimiz müəyyənləşəcək”.

"Layihə AFFA yanında Media Komitəsi tərəfindən maliyyələşdirilir"