Nazir Azərbaycan Minifutbol Federasiyasına təşəkkür etdi: “Bu, çox vacibdir”

“Doğma azarkeşlər qarşısında çıxış etmək çox məsuliyyətlidir. Lakin biz inanırıq ki, minifutbol millimiz Bakıda keçiriləcək dünya çempionatında uğurla çıxış edəcək”.

Futbolxeber.az saytının məlumatına görə, bu sözləri gənclər və idman naziri Fərid Qayıbov Dənizkənarı Bulvar ərazisində mayın 21-dən iyunun 1-nə qədər Bakıda keçiriləcək minifutbol üzrə dünya çempionatı ilə bağlı təşkil olunmuş “Fan Zona”nın açılışında deyib.

O, gözəl təşkilatçılığa görə Azərbaycan Minifutbol Federasiyasına təşəkkür edib: “Fürsətdən istifadə edib azarkeşləri Milli Gimnastika Arenasına dəvət edirəm ki, komandamıza dəstək olsunlar. Həm dünya çempionatının Bakıda keçirilməsinə, həm də təşkilatçılığa görə Minifutbol Federasiya təşəkkür etmək istərdim. Bakıda tez-tez müxtəlif dünya və Avropa çempionatları keçirilir. Lakin çoxdandır ki, paytaxtımızda “Fan Zona” təşkil olunmurdu. Bu, turnirin təbliğatı baxımından çox vacibdir. İnsanlara müxtəlif təbliğat yolları ilə çatmaq olar. Bu da həmin üsullardan biridir. Bulvarda gəzişən, Bakıda dünya çempionatının keçirilməsindən xəbərsiz olan insanların da artıq bu barədə məlumatı olacaq”.