Minifutbol millimizin baş məşqçisi: “Əsas məsələ qrupdan çıxmaqdır”

“Çox xoşbəxtik ki, belə bir mötəbər yarış bizim ölkəmizdə, Bakı şəhərində keçiriləcək”.

Futbolxeber.az saytının məlumatına görə, bu sözləri minifutbol üzrə Azərbaycan millisinin baş məşqçisi Elşad Quliyev Bakıda keçiriləcək dünya çempionatı barədə danışarkən deyib.

Bu gündən etibarən Dənizkənarı Bulvar ərazisində mayın 21-dən iyunun 1-nə qədər Bakıda keçiriləcək minifutbol üzrə dünya çempionatı ilə bağlı “Fan Zona” təşkil olunub.

“Fan Zona”da jurnalistlərin suallarını cavablandıran E.Quliyev qeyd edib ki, dünya çempionatında millimizin ilk hədəfi qrupdan çıxmaqdır: “Komandamızın hazırlıq səviyyəsi yüksəkdir. Kollektivdə hər şey qaydasındadır. İlkin hədəfimiz qrupdan çıxmaqdır. Bu, əsas məsələdir. Sonra növbəti hədəflərlə bağlı məsələyə aydınlıq gətirəcəyik. Görəcəyik ki, nə qədər irəliləyə bilərik”.

O, əvvəlki illərlə müqayisədə millidə daha modern kollektivin formalaşdığını vurğulayıb: “Komandada taktiki və texniki tərəfdən dəyişikliklər etmişik. Daha modern bir komanda formalaşdırmışıq. İnanıram ki, meydanda daha yaxşı kollektiv görə biləcəksiniz”.

Millimizin baş məşqçisi azarkeşlərə də səslənib: “Çox istərdik ki, bizə dəstək olsunlar. Dünya çempionatında fanatların dəstəyinə çox ehtiyacımız var”.

E.Quliyev qeyd edib ki, millimizin qrupdakı ilk oyunundan çox şey asılıdır: “Qrupdakı rəqibləri analiz etmişik. İlk oyundan çox şey asılıdır. Həmin matçda yaxşı nəticə qazana bilsək, qrup lideri olmaq şansımız artacaq”.

Xatırladaq ki, millimizin qrupdakı ilk rəqibi Bəhreyn yığmasıdır. Bu qarşılaşma mayın 21-də keçiriləcək. İki gün sonra Sloveniya ilə üz-üzə gələcək millimiz, mayın 25-də də Mavritaniya ilə qarşılaşacaq.

Fərəc Aslanov