“Heç-heçə bizim üçün pis nəticədir”

“Qələbə qazanmaq istəyirdik. Oyuna yaxşı başladıq, erkən qol vurduq. Sonra real şansımız oldu. Bundan sonra sanki komanda 10 dəqiqə dayandı, üstünlüyü rəqibə verdi. Beşinci oyunçunu meydana buraxdıq ki, nəticəni dəyişək, fasiləyə qədər alınmadı”.

Futbolxeber.az saytının məlumatına görə, bu sözləri Avropa çempionatının əsas mərhələsi çərçivəsində bu gün Yunanıstana qarşı keçirilən oyundan (2:2) sonra millimizin baş məşqçisi Vitali Borisov deyib.

O, ikinci hissəyə yaxşı başladıqlarını bildirib: “Rəqib foul limitini erkən doldurdu. Təəssüf ki, bizim əsas oyunçular tez yoruldular. Buna görə də beşin dördə oynadıq. Fərqlənmək istəyərkən, səhvə yol verdik və qapımızda qol gördük. Heç-heçə bizim üçün pis nəticədir”.

Mütəxəssis qeyd edib ki, bu heç-heçə ilə millimiz növbəti mərhələ şansını xeyli çətinə salıb: “Şans qalır, ancaq bizdən asılı olmayacaq. Yəni maksimum xal toplasaq belə, digər millilərin nəticəsini gözləməliyik”.

Yunanıstan millisi ikinci hissənin ortasında 5 foul yığsa da, qalan 10 dəqiqə ərzində millimiz heç cür istəyinə çata bilməyib. Borisov bunun səbəbini belə izah edib: “Onları 6-cı foulu etməyə məcbur edə bilmədik. Həmin vaxt biz beşin dördə oynayırdıq. Belədə foul qazanmaq çətin olur. Gərək driblinq edəsən. Futzalçılarımız yorulduğuna görə, driblinq edə bilmədik”.