Kurban Berdıyevdan qələbə şərhi

"Qalib gəldiyimiz üçün çox sevinirəm. Çox ağır oyun oldu. Matçın sonlarına yaxın təşəbbüsü əldən verdik. Amma istənilən qələbəyə görə şadam".

Futbolxeber.az saytının məlumatına görə, bu sözləri “Turan Tovuz”un baş məşqçisi Kurban Berdıyev Azərbaycan Premyer Liqasının X turunda “Sabah”ı 3:2 hesabı ilə məğlub etdikləri oyundan sonra deyib.

Daha sonra mütəxəssis jurnalistlərin suallarını cavablandırıb:

- Qələbədə həlledici məqam nə oldu?

- Əsas məsələ çempiona qarşı köklənmək idi. Uşaqlar özlərini sübut etmək istəyirdilər. İkincisi, nizam-intizam rol oynadı. Amma təbii ki, son 10 dəqiqəni çıxmaq şərtilə.

- Hayderson Hurtado yersiz sarı vərəqə aldı ki, sizi də əsəbiləşdirdi. Qələbəyə görə onu bağışlamaq olar?

- Emosiyalara görə oldu. Ona elə gəldi ki, top rəqibin futbolçusunun əlinə dəymişdi. Ancaq emosiyalarına hakim olmalı idi. Bəli, bilirəm ki, cəzalı duruma düşdü.

- "Turan" voleybol komandası dünən qələbə qazandı, bu gün Çempionlar Liqasının iştirakçısını isə siz məğlub etdiniz. Yayda Tovuzda Avropa komandalarını görəcəyik?

- "Turan" voleybol komandasının ilk oyununu da izləmişdim. Dünənki cavab görüşün də izlədim. Onlara görə həyəcan keçirirdim. Şükür Allaha, qələbə qazandılar. Allah qismət etsin ki, Bolqarıstan klubuna da qalib gəlsinlər. Bu, Tovuz azarkeşləri üçün bayramdır. Biz də öz dəstəyimizi verməliyik.