Roy Kehat: “Oyunlar bu cür ot örtüyü olan stadionlarda keçirildikcə...”

“Sumqayıt”ın yarımmüdafiəçisi Roy Kehatın Futbolxeber.az saytına müsahibəsi

- Mövsümdə ilk məğlubiyyəti “İmişli” ilə oyunda aldınız. Uduzmağınıza səbəb nə oldu?

- Hazırda olduqca məyusam. Oyuna nəzarət bizim tərəfimizdə idi. Bununla belə, düşünürəm ki, oyunlar bu cür ot örtüyü olan stadionlarda keçirildikcə  fərqlənmək üçün şansımız az olacaq. Əgər bu şanslardan faydalana bilmiriksə, cəzalandırılacağıq, yəni rəqib fərqlənəcək. Gördüyünüz kimi, bu, “İmişli” ilə matçda baş verdi.

- Uduzmağınıza baxmayaraq artıq matç ərzində məlumat yayıldı ki, rəqibə texniki məğlubiyyət veriləcək. Oyunun gedişində bundan xəbəriniz oldu?

- Düzünü desəm, oyunda bu barədə bir şey eşitməmişdim. Rəsmi qərarı gözləyəcəyik. Yalnız bundan sonra nəsə fikir bildirmək düzgün olar.

- 3 xal qazanmağınıza nə əngəl oldu?

- Belə matçlarda xal qazanmaq imkanı çətin olur. Xüsusilə, "İmişli" fərqlənəndən sonra mövqeləri olduqca yaxşı bağlaya bilirdi. Ona görə də əlimizə az imkan düşdü. Belə vəziyyətdə fərqlənə bilmirsənsə, məğlub olursan.

- Sözlərinizdən belə anlaşıldı ki, qazon amili oyununuza böyük təsir göstərdi...

- Əlbəttə, oyun üslubumuza çox təsir göstərdi. Bununla belə meydanda bacardığımıza edib, üzərimizə düşən tapşırıqları icra etməyə çalışdıq.

- Növbəti matçlarda ard-arda "Neftçi", "Sabah", "Turan Tovuz"a qarşı oynayacaqsınız. Fikrinizcə, "Sumqayıt" bu gərgin qrafika hazırdır?

- Bəli, hər bir matça ayrı-ayrılıqda hazırlaşmağımız üçün kifayət qədər vaxtımız olacaq. Çətin matçlar bizi gözləyir, hər bir rəqibimiz baxımlı futbol oynayır, təcrübəli komandalardır. Bizim də heyətimiz onlardan geri qalmır. Rəqiblərimizi təhlil edib ciddi hazırlıq görəcəyik.

- Bu 3 oyunda neçə xal qazansaz, "Sumqayıt" üçün uğurlu sayılar?

- Bunu demək çətindir. Mən indidən bütün oyunlar barədə düşünə bilmərəm. Hər rəqib barədə diqqətli, ayrı-ayrılıqda təhlil aparmaq lazımdır. Ona görə də diqqətlə hazırlaşmalıyıq. Hazırda yalnız "Neftçi" ilə matç barədə düşünürəm.

Azad Nuriyev