Saşa İliç: “Belə meydandansa, süni örtükdə oynamaq daha yaxşıdır”

"Meydança çox pis vəziyyətdə idi. Bu da bizim üçün problemlər yaratdı. Bəzi səhvlərimiz oldu və qol buraxdıq. Bizim daha yaxşı komandamız var. Sadəcə bəxtimiz də gətirmədi".

Futbolxeber.az saytının məlumatına görə, bu sözləri “Sumqayıt”ın baş məşqçisi Saşa İliç Azərbaycan Premyer Liqasının 4-cü turunda “İmişli” ilə oyundan sonra keçirilmiş mətbuat konfransında deyib.

Daha sonra o, jurnalistlərin suallarını cavablandırıb:

- Texniki qələbə münasibəti ilə rəqibi təbrik etmək olar?

- Rəsmi məlumat yoxdur. Nəsə demək olmaz.

- Paytaxtdan ilk dəfə bölgəyə çıxdınız. Qubadakı ab-hava necə idi? Bu cür təbii örtüklü meydançadansa, Şamaxıdakı süni örtüklü meydançada oynamağa üstünlük verərdiniz?

- Belə meydanda oynamaq çox çətindir. Problemli meydandır. Əslində, belə meydanda oynamaqdansa, süni örtüklü meydanda oynamaq daha yaxşıdır. Amma buna mən yox, federasiya qərar verir. Gözəl kompleksdir. Lakin meydanın pis durumda olması, hər şeyi alt-üst edir.

- Mehdi Cənnətov topa çıxışlarda səhvə yol verir. Bununla bağlı tədbir görəcəksiniz?

- Mehdi çox təcrübəli qapıçıdır. Bu klubda da bir neçə mövsüm oynayıb. Futboldur da, səhvlər olur.

- Növbəti matçı evdə "Neftçi" ilə qarşılaşacaqsınız. Bu görüş "Sumqayıt" üçün prinsipial sayılır. Çünki rəqibin baş məşqçisi "Sumqayıt"dan ora gedib...

- "Neftçi" Azərbaycanın böyük klublarından biridir. Oyuna maksimum hazırlaşacağıq. Xüsusi prinsipiallıq yoxdur.