Elmar Baxşıyev: “Azarkeşlərə səslənirəm, sabah bizi tək buraxmasınlar”

“Komanda olaraq sabahkı oyuna hazırlığımız qaydasında gedir. Ən yaxşısını etməyə çalışırıq”.

Futbolxeber.az saytının məlumatına görə, bu sözləri “Araz-Naxçıvan”ın baş məşqçisi Elmar Baxşıyev UEFA Konfrans Liqasının 3-cü təsnifat mərhələsinin ilk oyunu çərçivəsində "Omoniya"ya qarşı keçiriləcək matçdan öncə təşkil edilən mətbuat konfransında deyib.

Daha sonra o, jurnalistlərin suallarını cavablandırıb:

- "Qəbələ"nin baş məşqçisi kimi "Omoniya" ilə oynamısınız...

- Tanıdığımız rəqibdir. Amma "Qəbələ" ilə oynadığımız komanda deyil. Fərqli oyun dəst-xətti var. Komanda olaraq rəqibi incələmişik. Düşünürəm ki, lazım olan məlumatları komandaya vermişik.

- Sabah fərqli "Araz-Naxçıvan" görəcəyik?

- Oyuna hazırıq. Qarşımızdakı rəqib özünə hörmət edən rəqibdir. Komanda olaraq, inanırıq ki, uğurlu nəticə qazanmaq mümkündür.

- "Aris"lə müqayisədə "Omoniya"nın hücumları daha kəsərlidir. Kiprdə ən çox qol vuran komandadır. Sabah cəzalı İqor Ribeyro olmayacaq. Müdafiə planında dəyişiklik olacaq? Bəxtiyar Həsənalızadə ilə tandemdə kim oynayacaq?

- Yaxşı analizlər aparırsınız. Bunu müsbət kimi dəyərləndirirəm. Rəqibi incələyirsiniz. Amma bizim anlayışımızda “ilk 11-lik” və ehtiyat qüvvə yoxdur. Sərəncamımda olanların hamısı oyuna hazırlaşırlar. Onlar meydanda hər şeylərini verməyə hazırdırlar. Kimin üzərində dayanacağıqsa, komandaya hər şeyini verməyə çalışacaq.

- Sistem dəyişikliyi edəcəksiniz?

- Sistem dəyişikliyi təklif edirsinizsə, bu fikirdə deyilik (gülür). Rəqibə görə sistemi dəyişmirik. Komanda olaraq öz düşüncələrimiz var ki, onu icra etməyə çalışacağıq.

- "Omoniya" səddini keçsəniz, liqa mərhələsinə ümid etmək olar?

- İndi elə mərhələdəyik ki, daha çox Liqa mərhələsini yox, sabahı düşünməliyik. Gəlin, pillə-pillə gedək. Qismətdə varsa, gedib ora çıxacağıq.

- Sabah Naxçıvanda oyun monitorda canlı yayımlanacaq...

- Stadiona gələnlər 12-ci oyunçuya çevrilir. Bizə də səfəröncəsi sual verirdilər ki, Yunanıstanda dolu tribunalar qarşısında komanda necə oynayacaq? Futbolçularım da azarkeş ordusunu hiss etmək istəyirdilər. Azarkeşlərə səslənirəm, sabah bizi tək buraxmasınlar, bizə inansınlar. Komanda olaraq onları sevindirməyə çalışacağıq.