18 May 2024, Şənbə
XXXV turun hakim təyinatları
“Şamaxı” zirvəyə yüksəldi
Mirzov "Neftçi"dən ayrılır?
Mövsümün ən yaxşıları müəyyənləşdi

Ölkə futbolu

“Sumqayıt”ın kapitanı azarkeşlərə səsləndi: “Zirə” ilə oyunda bizi tək qoymasınlar”

“Sumqayıt”ın kapitanı Vüqar Mustafayevin Futbolxeber.az saytına müsahibəsi

 

- Azərbaycan Premyer Liqasının 29-cu turunda “Neftçi” səfərində 1 xal qazandınız. Bu heç-heçəni necə dəyərləndirirsiniz?

- Oyunun mahiyyətini bilirdik. Əsas rəqiblərimizdən biri ilə qarşılaşırdıq. Könül istərdi ki, qələbə qazanaq. Yekunda heç-heçə ilə kifayətləndik. Həmin matçdakı səhvləri analiz edib, növbəti oyuna daha yaxşı hazırlaşmalıyıq.

- Matçın gedişində öndə olsanız da, yekunda heç-heçə ilə kifayətləndiniz. Qələbə hesabını qorumaq üçün nə çatışmadı?

- Bərabər səviyyədə oyun gedirdi. Rəqibdə də, bizdə qol epizodları olmuşdu. Amma biz 1:0-da 100 faizlik şanslarımızdan istifadə etsəydik, meydandan daha yaxşı nəticə ilə ayrılardıq. Təəssüf ki, alınmadı.

- Oyundan əvvəl məlum idi ki, “Zirə” artıq turnir cədvəlində sizi geridə qoyub, ikinci pilləyə yüksəlib. Bu məqam çıxışınıza nə dərəcədə təsir etdi?

- Düzdür, nəticədən xəbərdardıq. Lakin biz rəqiblərimizin oyununa baxmırıq. Çünki əsas öz oyunumuzdur. Azarkeşlərə təşəkkür edirəm. Bizə əla dəstək oldular. İnanıram ki, “Zirə” ilə matçda onları sevindirəcəyik.

- Matçdan sonra əsas müzakirə mövzusu hakimlik oldu...

- Hakimlik barədə çox danışmaq istəmirəm. Yalnız onu deyim ki, penalti epizodunda mən rəqib oyunçunu görmürdüm. Yəni onun ayağını qəsdən tapdalamadım. Amma hakim penalti təyin etdi. Başqa çempionatda bu epizodda penalti verərdilər, verməzdilər, bu, müzakirə mövzusudur. İstənilən halda ilk növbədə səhvi özümüzdə axtarmalıyıq. Bayaq da dediyim kimi, vaxtında ikinci qol vursaydıq, hər şey fərqli olardı.

- Uzun müddətli zədədən sonra ilk dəfə “Neftçi” ilə görüşdə start heyətində meydana çıxdınız. Öz oyununuzdan nə dərəcədə razı qaldınız?

- Fiziki olaraq bəlkə də 100 faiz formada deyiləm. Amma çalışdım, əlimdən gələni edim ki, komandama kömək olum. Performansımı daha da yaxşılaşdırmalıyam. Mövsümü yaxşı formada başa vurmaq istəyirəm.

- Bayaq azarkeşləri qeyd etdiniz. Qarşıdan “Zirə” ilə ev oyunu gəlir və turnir cədvəli baxımından bu matç “Sumqayıt” üçün çox vacibdir. Mühüm oyun öncəsi azarkeşlərə nə demək istərdiniz?

- Stadiondakı ilk matçda “Neftçi”yə qalib gəldik, sonra heç-heçə, məğlubiyyət oldu. Bəlkə də bu nəticədən sonra azarkeşlərdə inciklik yaranıb. Lakin mən onlara səslənirəm, “Zirə” ilə oyunda bizə dəstək olsunlar, komandanı tək qoymasınlar. Çünki bu matç bizim üçün çox vacibdir. Ümumilikdə isə mövsümün sonuna 7 tur qalıb və hər matç mühüm əhəmiyyət kəsb edir. Yekunda nəticə qazanmaq istəyiriksə, bu oyunlardan bərk yapışmalıyıq. Azarkeşlərin dəstəyinə ehtiyacımız var.

- Bu gün çempionatda 6-7 komanda medallar, avrokuboklar uğrunda mübarizə aparır. Necə düşünürsünüz, bu mübarizədə hansı amil həlledici olacaq?

- Öz komandamız barədə onu deyə bilərəm ki, ilk növbədə rəqibləri kənara qoyub, öz oyunumuzu düşünməliyik. Biz maksimum nəticə göstərsək, sonda üzü gülən tərəf olarıq.

- Mövsümün əvvəlində çoxları “Sumqayıt”ın sona 7 tur qalmış ikinci pillədən 2, üçüncü yerdən isə cəmi 1 xal geri qalmaqla dördüncü pillədə olacağını, medallar, avrokuboklara vəsiqə uğrunda mübarizə aparacağını proqnozlaşdırmırdı. Hətta klub tarixində rekord da yeniləndi. Bütün bu məqamlar komandanın üzərində əlavə basqı, təzyiq yaratmır?

- Turnir cədvəlində vəziyyət elədir ki, bu gün ikinci yerdəsən, bir oyun uduzsan, 5-6-cı yerlərə düşə bilərsən. Yaxud əksinə. Bax bu məqam təzyiq yaradır. Ola bilər ki, bir qədər hazırkı mövqeyi itirmək qorxusu olsun. Amma bütün təzyiqlərin öhdəsindən gəlib, son 7 turda yaxşı çıxış etməliyik. Çünki mövsüm boyu çəkilən əziyyətin yekunu məhz sonda qazanacağımız nəticədir.

İbrahim CƏFƏROV




Şərh yazılmayıb
ŞƏRH YAZ
Adınız, Soyadınız *  
E-mail    
Təhlükəsizlik kodu    
Kodu daxil edin *  







Arxiv

May 2024
B.eÇ.aÇC.aCŞB
01 02 03 04 05
06 07 08 09 10 11 12
13 14 15 16 17 18 19
20 21 22 23 24 25 26
27 28 29 30 31