"Kəpəz"ə yenə Gəncədə oynamaq qadağası

Peşəkar Futbol Liqası "Kəpəz"in 2 ev oyununun məkanını dəyişib.

Futbolxeber.az saytının məlumatına görə, bu barədə qurumun mətbuat xidmətinin yaydığı açıqlamada bildirilib.

Qeyd edilib ki, Gəncə şəhər stadionunun ot örtüyünün vəziyyəti Misli Premyer Liqasının oyunlarını qəbul etmək üçün yararlı deyil. Bununla əlaqədar Peşəkar Futbol Liqası “Kəpəz”  klubunun müraciət və təsdiq məktubunu nəzərə alaraq aprel ayının əvvəlcədən açıqlanan təqvimində dəyişiklik edib.

Dəyişikliyə əsasən, "Kəpəz" aprelin 15-də “Turan Tovuz”a və aprelin 29-u “Sumqayıt”a qarşı ev oyununu Qəbələ şəhər stadionunda keçirəcək.

Renovasiya işlərinə Peşəkar Futbol Liqası tərəfindən baxış keçirildikdən sonra “Kəpəz”  klubunun 33-cü turdan sonrakı ev oyunlarının Gəncədə keçirib-keçirməyəcəyinə yekun qərar veriləcək.