Araz Abdullayevin törətdiyi qəzanın ÖZƏL təfərrüatları Futbolxeber.az-da!

"Neftçi"nin və millimizin üzvü Araz Abdullayev dünən "Nissan" markalı avtomobili ilə qəza törədib. Futbolxeber.az-ın əldə etdiyi məlumata görə, qəzanın baş verməsində başlıca səbəb yüksək sürət həddi olub. Belə ki, həmin vaxt Araz Abdullayev komanda yoldaşlarından biri (həmin futbolçunun adı bizə söylənsə də, məlumat 100 faiz dəqiq olmadığı üçün hələlik onun adını açıqlamırıq-red.) ilə yolda yarışa çıxıb. 2 futbolçu güclərini bu dəfə futbol meydanında deyil, məhz yolda sınamaq qərarına gəliblər. Arazla yarışa çıxan komanda yoldaşı idman modeli olan BMW avtomobili idarə edib. Yekunda isə gənclərin yarışa çıxması bədbəxt hadisə ilə yekunlaşıb. Araz qəzanı törətdiyi an həmin yerdə 6 süpürgəçi olsa da, onlardan 4-ü kənara atılmağa imkan tapıb.

Əldə etdiyimiz başqa bir məlumata görə, bu, Arazın avtomobillə bağlı üzləşdiyi ilk problem deyil. Belə ki, Abdullayevin idarə etdiyi avtomobilin səsboğanı ("qluşitel"i) həddindən artıq yüksək səsli olduğu üçün bir müddət əvvəl Bakı şəhər Baş Polis İdarəsindən (BŞBPİ) həmin avtomobilin saxlanılması ilə bağlı göstəriş verilib. Mülki geyimdə olan BŞBPİ əməkdaşları Arazı saxlayarkən isə o müqavimət göstərib və yekunda Araz Abdullayev həbs olunub. Olay böyük-səs küyə səbəb olub və yekunda yalnız Rövnəq Abdullayevin işə qarışmasından sonra Araz Abdullayev azadlığa buraxılıb.     

Etibarlı mənbənin bizə verdiyi məlumatda o da qeyd olunur ki, klub prezidenti Sadıq Sadıqov və baş məşqçi Böyükağa Hacıyev dəfələrlə Araz Abdullayev də daxil olmaqla komandanın gənc futbolçularına xəbərdarlıq ediblər ki, avtomobillərini yüksək surətlə idarə etməsinlər.