"Hər kəsi Araz Abdullayevə mənəvi dəstək olmağa çağırıram"

"Vaxtı ilə bizim də başımıza belə bir iş gəlmişdi. Oğlum Ceyhun "Qəbələ"də oynayarkən avtomobil qəzası törətdi və bu qəza onun karyerasının başa çatması ilə nəticələndi. Ceyhuna 3 il 6 ay iş verdilər. Buna görə də 29 yaşında futboldan getməli oldu". Futbolxeber.az saytına verdiyi açıqlamda bu sözləri Cəbrayıldan olan Qarabağ müharibəsi veteranı, vaxtı ilə "MKT-Araz" və "Qəbələ" klublarında forma geymiş Ceyhun Adışirinovun atası Vaqif Əlisoy deyib.

Vaqif bəy bildirib ki, bu cür çətin məqamda Araz Abdullayevə dəstək olmaq lazımdır: "Həmin vaxt futbol ictimaiyyətindən heç kim Ceyhuna dayaq durmadı. Mən Arazın qəza törətməsini eşidəndə çox pis oldum. Bu elə bir işdir ki, hər kəsin başına gələ bilər. Özüm də ailəsini tanıyıram. 21 yaşı var, Azərbaycan futbolunun gələcəyidir. Arazın yaxşı günləri hələ qabaqdadır. Buna görə də mən sizin saytınız vasitəsilə hər kəsi Araz Abdullayevə mənəvi dəstək olmağa çağırıram. Bu ağır dəqiqələrdə hər birimiz Araza dsəstək olmalıyıq. Həmin vaxt bu mənəvi dəstəyi mənim oğluma vermədilər. Bunun nə demək olduğunu bilirəm. Ona görə də bu çətin anda biz Araza mənəvi dəstək verməliyik".