"Bellami, Arşavin kimi futbolçuların adının "Xəzər Lənkəran"la yanaşı çəkilməsi yaxşı haldı"

"Con Benjamin Toşakın köməkçilərinin kimlər olacağı barədə hər hansı bir yenilik yoxdur. Emin Quliyev, Erik Roketa və Hafiz Əliyev bugünkü gündə komandada fəaliyyətlərini davam etdirirlər". Futbolxeber.az saytına verdiyi açıqlamada bu sözləri "Xəzər Lənkəran"ın idman direktoru Babək Quliyev deyib.

Babək bəy son günlər mətbuatda Erik Roketanın tezliklə komandadan gedəcəyi haqda yayılan xəbərlərə də aydınlıq gətirib: "Hələ ki belə bir söhbət yoxdu. Əvvəl olduğu kimi hər 3 məşqçi yenə də klubdakı işlərini davam etdirirlər. Toşak hələ ki köməkçiləri barədə bizə bir söz deməyib. Bu barədə bir yenilik olan kimi mətbuata da açıqlama verəcəyik".

B.Quliyev dünya və ölkə mətbuatında Kreyq Bellami və Andrey Arşavin kimi ulduzların "Xəzər Lənkəran"a transfer olunacağı haqda yayılan xəbərləri də şərh edib: "Bellami, Arşavin kimi futbolçuların adlarının "Xəzər Lənkəran" yanaşı hallanması yaxşı haldı. Amma Toşak bu barədə rəhbərliyə hər hansı bir söz deməyib. Ortada rəsmi heç nə yoxdur. Hazırda mövsümün sonuna elə də çox vaxt qalmayıb. Toşak indi gələcəyin planlarını cızır. Onun qarşısında duran əsas vəzifə gələn mövsüm komandanın uğurlu çıxış etməsidir".