Bentu yenə hörmətsizlik etdi

Azərbaycan - Portuqaliya oyunundan insident yaşanıb. Futbolxeber.az-ın məlumatına görə, qonaqların baş məşqçisi Paulo Bentu keçirdiyi mətbuat konfransında onun Portuqaliya dilində səsləndirilən fikirlərinin Azərbaycan dilinə tərcümə olunmasına imkan verməyib. Əvvəlcə Portuqaliya Futbol Federasiyasının mətbuat xidmətinin rəhbəri üzrxahlıq edərək bildirib ki, Bentunun fikirləri Azərbaycan dilinə tərcümə olunmasın. Lakin azərbaycanlı jurnalistlər buna etirazlarını bildiriblər. Onlar qeyd ediblər ki, hələ oyundan bir gün əvvəl keçirilən mətbuat konfransında da Portuqaliya tərəfi jurnalistlərə eyni hörmətsizliyi edib. Təkidlərinin bir nəticə vermədiyini görən yerli jurnalistlər mətbuat konfransının keçirildiyi zalı tərk ediblər.

Portuqaliya Futbol Federasiyasının nümayəndəsi Azərbaycan tərəfinə bu hörmətsizliyin səbəbini onunla izah edib ki, Portuqaliya televiziyası mətbuat konfransından canlı yayım təşkil etdiyi üçün onlar fikirlərinin Azərbaycan dilinə tərcümə olunmasına razı deyillər.