Xaqani Məmmədov Lüksemburqla oyuna qiymət verdi: "Buna da şükür"

"Hesab edirəm ki, millimiz Lüksemburqa qarşı normal oynadı. Düzdür, komandamız bundan da yaxşı oynaya bilərdi. Amma bu futboldu və oyunda istənilən nəticə qeydə alına bilər". Bu sözləri Futbolxeber.az saytına verdiyi açıqlamada millimizin keçmiş üzvü Xaqani Məmmədov deyib.

Veteran hücumçu qeyd edib ki, yığmamız Lüksemburqda 1 xal qazanmayıb, əksinə 2 xal itirib: "Düşünürəm ki, yığmamız səfərdə 1 xal qazanmadı, əksinə itirdi. Təbii ki, hər birimiz istərdik ki, komandamız qələbə qazansın. Amma olmayan yerdə buna da şükür".

Xaqani Məmmədov yığmamızın bu gün Portuqaliyaya qarşı keçirəcəyi oyundan da söz açıb: "Millimizə inanıram. Komandada özünəinam var. Portuqaliya ilə görüşdə təhlükəli əks-hücumlar qurub, gözəl oyun sərgiləsək, uğur qazana bilərik. İnanıram ki, rəqibdən xal ala bilərik, bu, mümkündür. Uşaqlar özlərinə inanmalı, rəqibin adına baxmamalıdırlar. Özünəinam hiss yığmamıza bu gün xal qazandıra bilər".