Rikardinyo: “Avroliqadakı çıxışımızdan utanmamalıyıq”

“PAOK-la oyunumuz yaxşı keçdi. Yeganə mənfi hal qələbə qazanmamağımız oldu”. Futbolxeber.az saytına açıqlamasında bu sözləri “Qəbələ”nin müdafiəçisi Rikardinyo deyib.

Braziliyalı futbolçu Avroliqanın qrup mərhələsinin beşinci turu çərçivəsində PAOK-la qolsuz bərabərə qaldıqları görüşü belə şərh edib: “Oyun ərzində yaxşı çıxış etdik. Xeyli qol şanslarımız oldu. Amma onlardan yararlana bilmədik. Bakıda ilk oyunda da PAOK-dan üstün idik”.

Rikardinyo qeyd edib ki, “Qəbələ” Avroliqadakı çıxışına görə utanmamalıdır: “PAOK-la oyundan öncə “Krasnodar”ın “Borussiya”nı məğlub etdiyini öyrəndik. Təbii ki, bu, ürəyimizcə deyildi. Lakin motivasiya baxımından hər hansı bir problem olmadı. Çünki futbol bizim işimizdi. Hər oyunda meydana çıxıb, bütün gücümüzü ortaya qoymalıyıq. Qrupda qalsaq da, Avroliqadakı çıxışımızdan utanmamalıyıq”.