Məhəmmədrəsul Məcidov rinqə çıxmaqdan imtina etdi

Boks üzrə ikiqat dünya çempionu, London Yay Olimpiya Oyunlarının bürünc medalçısı Məhəmmədrəsul Məcidov AİBA-nın təşkil etdiyi olimpiadaya lisenziya xarakterli Pro Boxing turnirində iştirakdan imtina edib. Futbolxeber.az-ın Sportpress.az-a istinadən verdiyi məlumata görə, təcrübəli boksçu xəstələndiyini əsas gətirərək rinqə çıxmaqdan imtina edib. Oktyabrın 24-də Bakıda təşkil olunacaq boks yarışında Məcidov 91 kq-dan yuxarı çəkidə Mihay Nistroyla qarşılaşmalı idi. İdmançımız yarışdan imtina etdikdən sonra AİBA onun yerinə alman idmançını iştirakçıların siyahısına daxil edib.

Qeyd edək ki, AİBA-nın bu ildən keçirdiyi peşəkar boks yarışında ümumilikdə 10 çəki dərəcəsində 8 idmançı iştirak edir. Turnirin finalçıları 2016-cı ildə Braziliyada keçiriləcək Yay Olimpiya Oyunlarına lisenziya qazanacaq. Məcidovun imtinasından sonra Azərbaycanın yarışda iki təmsilçisi qaldı. Ölkəmizin adından mötəbər yarışda dünya çempionu Cavid Çələbiyev (56 kq) və Fariz Məmmədov (69 kq) iştirak edəcək.